Самарқанд илмий-тажриба станцияси олимлари томонидан Ўзбекистондаги энг ширин помидор нави яратилди. Бу ҳақда Қишлоқ хўжалиги вазирлиги ахборот хизмати хабар берди.
Хабарга кўра, Қишлоқ хўжалиги вазирлиги ҳузуридаги Сабзавот, полиз экинлари ва картошкачилик илмий-тадқиқот институтининг Самарқанд илмий-тажриба станцияси олимлари томонидан помидорнинг маҳаллий “Мустақиллик- 28” янги нави яратилди. Томчилатиб суғориш йўли билан етиштирилган ушбу нав ташишга чидамлилиги, экспортбоплиги ва ҳосилдорлиги билан ажралиб туради.
Олимлар яратган янги навнинг ширинлилик даражаси 7 фоизга тенг ва бу кўрсаткич мамлакатда етиштирилаётган энг ширин помидорлар ичида рекорд кўрсаткич ҳисобланади.
Маҳаллий “Мустақиллик- 28” навли помидор ҳам юқори ҳосилдорлиги билан ажралиб туради. Бир гектар майдонда экилган оддий навли помидордан ўртача 40-50 тонна ҳосил олинса, маҳаллий “Мустақиллик- 28” янги навидан 150-200 тоннагача ҳосил олиш мумкин. Бир туп оддий помидор 15-20 дона ҳосил берса, олимларнинг меҳнати самараси билан янги нав 50 донагача ҳосил беради. Яна бир яхши хусусияти ушбу помидор ҳажми, терисининг керакли миқдорда қалинлиги, сувлилиги ва ўта ширинлиги билан ажралиб туради. Шунингдек, ушбу нав бир бор экилганда тўлиқ пишиб етилади ва 90 фоиз маҳсулот биринчи ва қолган 10 фоиз маҳсулот иккинчи теримда йиғиб олинади.
Изоҳ (0)