Ўзбек олимлари томонидан генетик векторлар ва помидор ўсимлиги асосида коронавирус инфекциясига қарши биринчи марта помидор ўсимлигидан тўғридан тўғри истеъмол қилинадиган янги авлод COVID-19 вакцинаси яратилди.
Олимлар томонидан коронавируснинг S1 антиген оқсилини кодловчи ген фрагменти махсус векторларга жойлаштирилиб, помидор ҳужайраси геномига киритилди. Бу ҳужайралардан S1 антигени оқсилини мунтазам ишлаб чиқарувчи помидор ўсимлиги олинди. Бундай ўсимликлардан олинган помидор мевасида 0.77 мкг/гр миқдорида турғун S1 антиген оқсили синтез бўлиши кўрсатиб берилди ва TOMAVAC вакцинаси сифатида танлаб олинди.
Яратилган TOMAVAC вакцинаси синовлари сичқонлар ва кўнгилли инсонлар қон зардобида (IgG) ҳамда ичакда юқори миқдорларда нейтралловчи антитаначалар (IgА) ҳосил бўлишини исботлади.
Бунда тажриба сичқонларида ва кўнгиллиларда ножўя таъсирлар кузатилмади.
Ушбу тадқиқот TOMAVAC’ни икки босқичли (ичак шиллиқ пардаси ва қонда) ҳимояни таъминловчи хавфсиз вакциналигини кўрсатди ва у биринчи тўғридан тўғри истеъмол қилинадиган COVID-19 вакцинаси сифатида илмий ҳамжамиятга тақдим этилди.
Яратилган вектор тизими ва тажриба асосида, зарур ҳолларда, Ўзбекистонда турли инфекцияларга қарши вакциналарни қисқа муддатларда яратиш ва жорий этиш имконияти ҳамда янги авлод мутахассислари шакллантирилди.
Вакцина устидаги тадқиқотлар хорижнинг нуфузли Frontiers in Nutritional Immunology (IF=5.0) журналида нашр қилиниб, сичқонларда ҳамда кўнгилли инсонларда ўтказилган биринчи фаза иммуногенлик ва биохавфсизлик синовлари натижаси эълон қилинди.
Изоҳ (0)