Афғонистоннинг жануби-шарқида ўн йиллик можаролар давомидаги мина портлаши оқибатида тўққиз нафар бола ҳалок бўлди. Бу ҳақда расмийларга таяниб, Al Arabiya хабар берди.
Ҳодиса Ғазна вилоятининг Геру туманида содир бўлган. Бир гуруҳ ёш ўғил-қизлар мина ўйнаб юрган пайтда у портлаб кетган.
“Россия босқинидан қолган ва портламай қолган мина болалар ўйнаб юрганида портлаб кетди. Афсуски, тўққиз нафар бола ҳалок бўлди”, — деди вилоят ахборот ва маданият бошқармаси бошлиғи Ҳамидулла Нисор.
Ғазна полициясига кўра, беш қиз ва тўрт ўғил бола қурбон бўлган. Улар тўрт ёшдан ўн ёшгача бўлган болалардир. Афғонистон дунёда миналар энг кўп жойланган мамлакат ҳисобланади. Дания қочқинлар кенгаши бош котибаси Шарлот Сленте Афғонистонда ҳар ой юздан ошиқ одам миналарга дуч келишини айтганди.
Афғонистон ҳудудлари 1979 йилдаги Совет истилоси, ундан кейинги фуқаролар уруши ва “Толибон”нинг 20 йил давомида ҳукуматларга қарши қўзғолонидан кейин портламаган миналар, граната ва миномётлар билан тўла.
Бироқ портламаган ўқ-дорилар ва миналар доимий равишда одамлар ҳаётига зомин бўлмоқда, Халқаро Қизил хоч қўмитаси асосий қурбонлар болалар эканини айтмоқда.
Изоҳ (0)