Тожикистоннинг Хатлон вилоятида 21 ёшли йигитнинг қўлида снаряд портлаб кетди. Бу ҳақда “Дарё”нинг Тожикистондаги мухбири хабар берди.
Ҳодиса Шамсиддин Шоҳин туманида жойлашган Шўрообод қишлоғида содир бўлган. Йигит олган тан жароҳати оқибатида ҳалок бўлган. Маҳалла раиси Ризо Умар мазкур маълумот бўйича журналистларга хабар берган.
Марҳум Фазлиддин Сангов Данғара давлат олийгоҳи талабаси бўлган. У акаси ва уч нафар ўртоғи билан тоққа сайрга чиққан ва у ерда снарядга кўзи тушган. Ҳамроҳларининг огоҳлантиришларига қарамай, Фазлиддин ерда ётган снарядни қўлига олган.
Снаряд эса унинг қўлида портлаб кетган ва йигит ўша заҳотиёқ ҳалок бўлган. Ҳодисага эҳтиётсизлик сабаб бўлгани айтилмоқда. Туман расмийлари ҳолат юзасидан бирор аниқ фикр билдирмаган.
Эслатиб ўтамиз, Шамсиддин Шоҳин тумани Афғонистонда жойлашган Бадахшон вилоятининг Роғистон тумани билан чегарадошдир. Мазкур ҳудудда мина ва бошқа портловчи қуроллар Тожикистон давлат чегарачилари томонидан тозаланган бўлса-да, аммо унинг қолдиқларидан баъзида маҳаллий аҳоли жабр кўради.
Чорёр Авлиёзода, Душанбе
Изоҳ (0)