Америкалик сенаторлар Том Коттон ва Марко Рубио ИШИД жангарилари АҚШга ҳужум қилиши эҳтимолидан хавотир билдирди. Бу ҳақда Hasht-e Subh Daily хабар берди.
Сенаторларнинг баёноти Москва вилоятидаги Crocus City Hall’даги терактдан кейин эълон қилинди.
Том Коттон террористик ташкилот АҚШдаги нишонларга ва хориждаги америкаликларга ҳужум қилишидан қаттиқ хавотирда эканини билдирди.
“Москвада бегуноҳ одамлар, аёллар ва болалар ўлдирилганидан чуқур афсусдаман, аммо кейинги ҳужум АҚШнинг Осиё ва Европадаги элчихоналарига ёки Европага академик сафари чоғида америкаликларга бўлиши мумкин”, — деб қўшимча қилди у.
Сенатор буни Америка қўшинларининг Афғонистондан “муваффақиятсиз” олиб чиқилиши билан боғлади. Марко Рубио эса сенаторлар хорижий қўшинларнинг Афғонистондан тўлиқ олиб чиқилишининг салбий оқибатлари ҳақида огоҳлантирганини эслатди.
“Биз қўшинларни Афғонистондан олиб чиқишни тезлаштиришни истамаслигимизнинг сабабларидан бири ИШИДга хориждаги нишонларга ҳужум қилиш учун операция майдони бериш эди”, — деди у.
Рубио ИШИДнинг Москвага уюштирган ҳужумига ишора қилиб, бу гуруҳ ҳали ҳам Америкадаги нишонларга ҳужум қилиши мумкинлигини айтди.
Эслатиб ўтамиз, ИШИД сўнгги бир неча ой ичида Афғонистон, Эрон ва Россияда қонли ҳужумлар уюштирди. “Толибон” Афғонистонда ИШИД йўқлигини даъво қилса-да, халқаро институтлар ва қўшни давлатлар Афғонистонда ИШИДнинг Хуросон бўлими фаоллигининг кучайиши ва бу гуруҳнинг Ғарб давлатларига ҳужум қилиши эҳтимолидан доимо хавотир билдириб келади.
Бир неча кун аввал Марк Рубио Вашингтоннинг БМТ орқали Афғонистонга молиявий ёрдам кўрсатишини тўхтатишга чақирганди. У инсонпарварлик ёрдами “террорчи гуруҳлар”ни кучайтириш учун ишлатилмаслиги таъминланмагунча, Афғонистонга ёрдамни тўхтатиш кераклигини айтган.
Аввалроқ АҚШ Конгресси Вакиллар палатасининг Ташқи алоқалар қўмитаси раҳбари Майкл Маккол ҳам ИШИДнинг Америка ва Европага таҳдидларидан хавотир билдирганди. У қўшинларнинг Афғонистондан олиб чиқилишини “катта хато” деб атаган, бу эса, унга кўра, Американи хавф остига қўймоқда.
Изоҳ (0)