Ўзбекистоннинг Буюк Британиядаги элчиси Равшан Усманов Буюк Британиянинг Cox&Kings сайёҳлик компанияси ижрочи директори Жорж Колвин билан учрашди. Бу ҳақда “Дунё” АА хабар берди.
Маълум қилинишича, 1758 йилда ташкил этилган Cox&Kings компанияси Буюк Британиядаги энг қадимий сайёҳлик бренди ҳисобланади. Компания, шунингдек, британиялик сайёҳлар учун хорижий турларни ташкил этишда ҳам етакчи саналади.
Мулоқот давомида Британиядан Ўзбекистонга туристлар оқимини ошириш, Ўзбекистоннинг сайёҳлик имкониятлари ва янги йўналишларини ҳамкорликда Британия кенг оммаси ўртасида тарғиб этиш масалалари муҳокама қилинган.
Жорж Колвин Ипак йўли чорраҳасида жойлашган ва турли маданиятларни бирлаштирган Ўзбекистон замини Бухоро, Самарқанд, Тошкент ва Хива сингари қадимий шаҳарлари ҳамда дунёга машҳур тарихий обидалари билан британиялик сайёҳларни фаол жалб этаётганини таъкидлаб ўтган.
“Сўнгги йилларда Ўзбекистоннинг ривожланган сайёҳлик инфратузилмаси ва очилаётган янги йўналишлар сайёҳлар учун мавсум даврини кенгайтиришга, уларнинг мамлакатда бўлиш вақтини узайтиришга хизмат қилмоқда. Шунингдек, мазкур ўзгаришлар Ўзбекистонга йилнинг исталган даврида саёҳат қилиш имконини бермоқда”, — деган у.
Музокаралар натижасида томонлар 2024 йилда 2500 нафар британиялик сайёҳларни Ўзбекистонга юбориш ва Ўзбекистон сайёҳлик жозибадорлигини Буюк Британияда кенг тарғиб қилиш мақсадида етакчи оммавий ахборот воситаларида мавзуга оид мақолаларни жойлаштириш тўғрисида келишиб олган.
Изоҳ (0)