Ўзбекистоннинг янги элчиси Ҳиндистон президентига ишонч ёрлиқларини топширди, деб хабар бермоқда “Дунё” ахборот агентлиги.
Маълум қилинишича, бугун, 27 март куни Ўзбекистоннинг янги тайинланган элчиси Сардор Рустамбоев Деҳлидаги “Раштрапати Бҳаван” саройида Ҳиндистон президенти Драупади Мурмуга ишонч ёрлиқларини топширди. Расмий маросимдан сўнг бўлиб ўтган суҳбат чоғида Ўзбекистон ва Ҳиндистон ўртасидаги кўп томонлама ҳамкорликнинг бугунги ҳолати ва уни янада ривожлантириш истиқболлари муҳокама қилинди.
Олий ва юқори даражалардаги мунтазам учрашувлар ва мулоқотлар икки давлатнинг кўп қиррали ва ўзаро манфаатли ҳамкорликни мустаҳкамлашдаги кучли сиёсий иродаси ва қатъиятини тасдиқлаётгани, стратегик шерикликни сифат жиҳатидан янги босқичга олиб чиқиш имкониятини тақдим этаётгани таъкидланди.
Сиёсий, савдо-иқтисодий ва маданий-гуманитар соҳаларда ҳамкорликни фаоллаштириш учун улкан салоҳият ва ўзаро интилиш мавжудлиги қайд этилди. Икки томонлама ҳамкорликнинг замонавий ҳолати юқори баҳоланиб, барча соҳаларда ўзаро манфаатли алоқалар янада ривожланишига ишонч билдирилди.
Ҳиндистон президенти Ўзбекистон элчисига ўзаро муносабатларни мустаҳкамлаш йўлидаги фаолиятига муваффақият тилади.
Изоҳ (0)