Татаристон раиси Рустам Минниханов амалий ташриф билан Сурхондарё вилоятига ташриф буюрди. Бу ҳақда вилоят ҳокимлиги матбуот хизмати хабар берди.
Мартабали меҳмонни Термиз халқаро аэропортида Сурхондарё вилояти ҳокими Улуғбек Қосимов бошчилигидаги расмийлар кутиб олди. Шундан сўнг, Ислом оламининг буюк алломаси, ҳадис илмининг етук олими Ал-Ҳаким ат-Термизий мақбараси зиёрат этилди. Қуръон оятлари тиловат қилинди.
Ташриф давомида эркин иқтисодий зона, логистика марказлари, ишлаб чиқариш корхоналари фаолияти билан танишув, воҳадаги тарихий ва диққатга сазовор жойларга ташриф ҳамда келгусидаги ҳамкорлик истиқболлари юзасидан музокаралар ўтказиш белгиланган.
Эслатиб ўтамиз, 2023 йил сентябрда Тошкент вилоятининг Чирчиқ шаҳри ҳокими Даврон Ҳидоятов Татаристон президенти Рустам Минниханов билан учрашганди. Октябрь ойида эса Шавкат Мирзиёев Россияга расмий ташриф доирасида Қозон шаҳрида Татаристон раиси Рустам Минниханов билан учрашув ўтказгани тўғрисида хабар берилганди. Учрашувда муҳим йўналишлар бўйича амалий шериклик лойиҳаларини қўшма “йўл харита”лари асосида илгари суришга келишиб олинган эди.
Изоҳ (0)