Тошкент вилоятида юк кузатув ҳужжатларида кўрсатилмаган 220 миллион сўмлик товар фош бўлди, деб хабар беради вилоят божхона бошқармаси матбуот хизмати.
Маълум қилинишича, хориждан “Яллама” чегара божхона пости орқали Ўзбекистонда фаолият олиб бораётган масъулияти чекланган жамиятнинг номига олиб келинган товарлар билан юкланган MAN ТGХ 18.440 русумли автотранспорт воситаси белгиланган тартибда божхона кўригидан ўтказилган.
Натижада, юк кузатув ҳужжатларида кўрсатилмаган, қиймати 220 миллион сўм бўлган 440 дона ҳар бири 4 литрдан бўлган High Ultrа 10W-40 мотор мойи борлиги аниқланган.
Жисмоний ва юридик шахслар амалдаги тартибларга мувофиқ, Ўзбекистон божхона чегарасини кесиб ўтишда ўзлари билан олиб кетаётган товар ва моддий бойликларни белгиланган меъёрлар асосида ишончли ва тўғри декларацияланиши учун қонун ҳужжатларига мувофиқ жавобгар.
Ҳозирда ҳолат юзасидан дастлабки суриштирув ҳаракатлари давом этмоқда.
Аввалроқ “Яллама” постида 830 млн сўмлик LED чироқларнинг мамлакатга ноқонуний олиб кирилишига чек қўйилгани тўғрисида хабар берилганди.
Изоҳ (0)