Tatariston raisi Rustam Minnixanov amaliy tashrif bilan Surxondaryo viloyatiga tashrif buyurdi. Bu haqda viloyat hokimligi matbuot xizmati xabar berdi.
Martabali mehmonni Termiz xalqaro aeroportida Surxondaryo viloyati hokimi Ulug‘bek Qosimov boshchiligidagi rasmiylar kutib oldi. Shundan so‘ng, Islom olamining buyuk allomasi, hadis ilmining yetuk olimi Al-Hakim at-Termiziy maqbarasi ziyorat etildi. Qur’on oyatlari tilovat qilindi.
Tashrif davomida erkin iqtisodiy zona, logistika markazlari, ishlab chiqarish korxonalari faoliyati bilan tanishuv, vohadagi tarixiy va diqqatga sazovor joylarga tashrif hamda kelgusidagi hamkorlik istiqbollari yuzasidan muzokaralar o‘tkazish belgilangan.
Eslatib o‘tamiz, 2023-yil sentyabrda Toshkent viloyatining Chirchiq shahri hokimi Davron Hidoyatov Tatariston prezidenti Rustam Minnixanov bilan uchrashgandi. Oktyabr oyida esa Shavkat Mirziyoyev Rossiyaga rasmiy tashrif doirasida Qozon shahrida Tatariston raisi Rustam Minnixanov bilan uchrashuv o‘tkazgani to‘g‘risida xabar berilgandi. Uchrashuvda muhim yo‘nalishlar bo‘yicha amaliy sheriklik loyihalarini qo‘shma “yo‘l xarita”lari asosida ilgari surishga kelishib olingan edi.
Izoh (0)