Ёзувчи Мурод Муҳаммад Дўст “Лолазор” подкастида Ўзбекистоннинг биринчи президенти Ислом Каримов туғилган кунини қандай нишонлагани тўғрисидаги саволга жавоб берди.
Ёзувчининг айтишича, марҳум туғилган кунини хорижда ва Ўзбекистонда нишонлаган пайтлари бўлган.
“Ислом Каримовнинг туғилган кунини 4 – 5 марта Швейцарияда нишонлаганмиз. Оддий стол тайёрланиб, дастурхонга овқатлар тортиларди. Фақатгина “сухой” виномиди, Ислом аканинг ичимлигини қуйиб берадиган одам доим уни қўлида ушлаб юрарди. Агар бирор жойга қўйса ҳам ўша идишдан кўз узмасди. Бу хавфсизлик нуқтаи назаридан бўлса керак. Кейин 1-2 марта шу ерда ҳам нишонланган. Лекин уйида қандай нишонлаганини билмайман. Туғилган кунида кабинетига кирардик, гулга ўхшаган нарса олиб кириларди, совға берилмасди. Амалдорлар президентга совға беришга қўрқарди. Ислом ака ҳам баъзи пайтлар билса, бошқаларни ҳам туғилган куни билан табрикларди”, — деди ёзувчи.
Суҳбатда Мурод Муҳаммад Дўст ўша даврда Ислом Каримовга берилган тўйга таклифнома воқеасини ҳам эсга олган.
“Ислом акада қизиқ жиҳатлар бор эди. Бир куни биттаси тўйга таклифнома олиб кирибди. Сал олдинроқ унинг қудаси ҳам таклифнома олиб келган экан. Ислом ака ‘Кўрмайсанми буларни, бунисининг қўлида пули бор, унисида кучи бор. Эртага бирортасида муаммо бўлса, буниси ўғли ёки қизини қўйиб юборади’, деганди. Лекин улар бир–бирини қўйиб юбормади. Аксинча, чамбарчас боғланиб кетишди. Ислом ака катталарни ўзаро қуда бўлишини ёмон кўрарди. Ахир, улар нима мақсадда қуда бўлаётган тушунарли-ку”, — дейди 1993–1999 йилларда Ислом Каримовнинг матбуот котиби бўлиб ишлаган Мурод Муҳаммад Дўст.
Аввалроқ ёзувчи Ислом Каримов шахсияти, у йўл қўйган улкан хатолардан бири тўғрисида хотираларини айтганди.
Изоҳ (0)