ИШИДнинг Хуросон бўлинмаси фаолиятидан хавотирдамиз — АҚШ

АҚШ давлат департаменти ИШИДнинг Хуросон бўлими фаолияти салоҳиятидан хавотир билдирди. Бу ҳақда Aamaj News хабар берди.

Давлат департаменти матбуот котиби Метю Миллер Вашингтондаги матбуот анжуманида тегишли баёнот берди. Россия ва Эронда ИШИД Хуросони уюштирган ҳужумларга тўхталиб, у АҚШ иккала давлатни ҳам террор ҳужуми ҳақида огоҳлантирганини эслатди.

Метю Миллер Европада сўнгги ҳибсга олиш жараёнларига ҳам тўхталиб, бу ИШИДнинг дунёда фаоллиги учун ташвиш уйғотувчи бошқа ҳолатлар эканини айтди.

“Биз ИШИД Хуросони таҳдидларига қарши ҳушёр бўлишимиз керак ва бу борада иттифоқдошларимиз ва ҳамкорларимиз билан ишлаяпмиз”, — деди Миллер.

У Афғонистон террорчилар учун хавфсиз бошпанага айланмаслиги кераклигини таъкидлаб, улар “Толибон”ни бу бўйича огоҳлантирганини эслатди. АҚШ давлат департаменти баёнотлари Россияда содир этилган қонли ҳужумдан сўнг ИШИД Хуросонининг Афғонистондаги фаолияти жиддий хавотирга айланган бир пайтда айтилмоқда.