Россия Миллий Хавфсизлик Кенгаши котиби Николай Патрушев ҳозир Афғонистонда 20 га яқин террорчи ташкилот, уларда 23 мингдан ортиқ жангари борлигини айтди.
Патрушев Бишкекда Хавфсизлик Кенгаши котибларининг Афғонистон масалалари бўйича йиғилишида Афғонистон Ғарбнинг чексиз геосиёсий саргузаштлари занжирининг ҳалқаларидан бири эканлигини ва Афғонистондаги ҳозирги мураккаб вазият учун асосий масъулият АҚШ ва унинг иттифоқчилари зиммасига тушиши кераклигини айтди.
Унинг сўзларига кўра, Вашингтон Афғонистондаги 20 йиллик фаолияти давомида вазиятни яхшилаш учун ҳеч нарса қилмаган.
Патрушевнинг қўшимча қилишича, “Ғарб чекинар экан, катта миқдордаги қуролларни ташлаб, соатли бомбани ишга туширди. Бугунги кунда бу қуроллар афғон ичидаги гуруҳлар ўртасидаги урушни кучайтириш учун қўлланилмоқда, улар қора бозорда сотилмоқда ва учинчи мамлакатларда террорчилар қўлига ўтиб кетмоқда”, — деди Патрушев.
Унинг қўшимча қилишича, Ғарб Афғонистондаги иштирокини оширишга қаратилган саъй-ҳаракатлари билан бир қаторда, ушбу давлатдаги террорчи гуруҳлардан турли мақсадларда фойдаланишга ҳам уринмоқда.
Хавфсизлик кенгаши котиблари йиғилишида Ҳиндистон, Эрон, Қозоғистон, Қирғизистон, Хитой, Тожикистон ва Ўзбекистон вакиллари иштирок этмоқда.
Изоҳ (0)