АҚШ мамлакат миллий хавфсизлигига таҳдидларнинг йиллик баҳоси бўйича ҳисоботни эълон қилди. Унда Афғонистон масаласи ҳам тилга олинган.
Ҳисоботда мухолифатнинг “Толибон” режимига таҳдидли қаршилик кўрсатиш эҳтимоли пастлиги, чунки “кўплаб афғонлар ‘Толибон’ уруши ва қасосидан” чарчаганлиги айтилади.
Ушбу ҳисоботда “Толибон”га қарши турган қуролли кучлар “кучли етакчи ва чет элдан ёрдамга эга эмас”лиги қўшимча қилинган.
Бироқ, АҚШ разведка агентликларининг хулосалари шуни кўрсатадики, “Толибон” режими Афғонистоннинг ҳозирги гуманитар инқирози ва иқтисодий заиф томонларини бартараф этмайди ва “диний бошқарувни амалга оширишга устувор аҳамият беришда давом этади”.
Ҳисоботда айтилишича, “Толибон” чекловчи чора-тадбирларни амалга оширишда, жамоат олдида жазони ижро этишда, норозилик намойишларини бостиришда, кўпроқ аёллар ва қизларнинг ўрта мактаб ва университетларда ўқишига йўл қўймасликда давом этади.
АҚШга кўра, минтақавий кучларнинг диққат марказида Афғонистон муаммоларини бу мамлакат ичида ушлаб туриш ва, шу билан бирга, “Толибон” билан икки томонлама ҳамкорликни кенгайтириш турибди.
Ҳисоботда минтақа давлатлари “Толибон”нинг бу ҳаракатни тан олиш талабига нисбатан эҳтиёткорлик билан муносабатда бўлиши таъкидланган.
Аввалроқ БМТ бош котиби ҳам ўз ҳисоботида “Толибон”нинг қуролли мухолиф гуруҳлари ушбу ҳаракатга қарши ҳудудларни назорат қилишда “ҳеч қандай қийинчилик” яратмаганини ёзган эди.
Изоҳ (0)