Нигер ҳарбий режими раҳбари генерал Абдураҳман Тиани 26 март куни Россия президенти Владимир Путин билан мулоқотда хавфсизлик соҳасидаги ҳамкорликни мустаҳкамлашга чақирган. Бу ҳақда The Moscow Times нашри хабар берди.
Хабарда айтилишича, жорий йилнинг январь ойида Нигер бош вазири Али Ламине Зайн делегацияси Москвага келганида ҳарбий алоқаларни мустаҳкамлашга келишиб олинган. Эндиликда ҳукуматлар мудофаа соҳасидаги ҳамкорлик лойиҳаларига амалий тус бермоқчи.
Дунёнинг энг қашшоқ давлатларидан бири бўлган Нигер Саҳел ҳудудидаги террорчиларга қарши курашда ҳозирга қадар Ғарб билан ҳамкорлик қилиб келган эди. Аммо ўтган йили сайланган президент ҳокимиятдан четлатилганидан кейин Россия энг муносиб янги мудофаа ҳамкори сифатида кўрилмоқда.
“Икки давлат раҳбарлари ҳозирги таҳдидларга қарши туриш учун хавфсизлик соҳасидаги ҳамкорликни кучайтириш зарурлиги ҳақида гаплашдилар”, — дея қисқа хабар берилади Нигерия эълон қилган баёнотда.
Кремль баёнотида айтилишича, томонлар сиёсий мулоқотни бошлаш ва турли соҳаларда ўзаро манфаатли ҳамкорликни ривожлантиришга тайёр эканликларини билдирган. Аммо Нигер ҳудудидаги террорчиларга қарши курашда амалий ёрдам бериш ҳақида хабар эълон қилинмаган.
Изоҳ (0)