Жорий йилнинг дастлабки уч ойи давомида Ла-Манш бўйлаб пуфлама қайиқларда Буюк Британияга рекорд миқдордаги ноқонуний мигрантлар келган. Бу ҳақда Буюк Британия Ички ишлар вазирлиги томонидан эълон қилинган расмий маълумотларда маълум қилинган.
Умуман олганда, йил бошидан буён Буюк Британияга Ла-Манш орқали 4,6 минг киши ноқонуний равишда келган, бу 2022 йилнинг биринчи чорагидаги кўрсаткичлардан кўп. 2022 йилда мамлакатга 4,5 минг ноқонуний мигрант келганди. 2023 йилнинг шу даврида ноқонуний мигрантлар сони 3,7 минг нафарни ташкил қилган.
Умуман олганда, 2023 йилда Буюк Британияга Ла-Манш канали орқали келган ноқонуний мигрантлар сони 29,4 минг кишини ташкил этди. Бу ўтган йилга нисбатан деярли уч баравар камдир. Мазкур кўрсаткич бош вазир Риши Сунакка ноқонуний мигрантларга қарши курашдаги муваффақиятлари ҳақида гапиришга имкон беради.
Бироқ 2018 йилдан бери ҳукмрон Консерватив партиянинг ноқонуний иммиграцияга қарши курашиш бўйича ваъдаларига қарамай, жами 110 мингдан ортиқ ноқонуний мигрантлар Буюк Британияга келган. Сунак аввалроқ бу масалани ҳукуматнинг асосий устувор йўналишларидан бири деб таърифлаган эди.
Бошпана сўраб мурожаатларни кўриб чиқиш даврида ноқонуний мигрантлар одатда махсус миграция марказларига жойлаштирилади, бироқ бу марказларнинг сони етарли эмас. Бундай мигрантларни сақлаш, Тhe Times газетасига кўра, Британия солиқ тўловчиларига йилига тахминан 4 миллиард фунт стерлинг (5 миллиард доллар) тушади.
Хусусан, меҳмонхоналарда ноқонуний мигрантларни жойлаштириш учун кунига тахминан 6 миллион фунт стерлинг (7,6 миллион доллар) сарфланади.
Изоҳ (0)