Германия ҳукумати озиқ-овқат инқирозига қарши курашиш учун Афғонистонга 15 миллион евро ажратди. Бу ҳақда Etilaatroz нашри хабар берди.
Хабарда айтилишича, Германия Иқтисодий ҳамкорлик ва тараққиёт вазирлиги Жаҳон озиқ-овқат дастури орқали Афғонистон халқига ёрдам ажратиш тўғрисида баёнот эълон қилган. Ёрдам ҳажми 15 миллион евро ёки 16,4 миллион доллар эквивалентида белгиланган.
Германия ҳукумати 2023 йилдан бошлаб Берлиннинг Афғонистонга ёрдамининг умумий миқдори 78 миллион еврога етганини маълум қилган. Германиянинг янги ёрдам пакети ночор қатламларнинг фаровонлиги ва афғон мактаб ўқувчилари озиқланиши учун ишлатилиши маълум қилинган.
Жаҳон озиқ-овқат дастурининг Афғонистондаги директори Сяо Вей Лининг айтишича, бу мамлакатда иқлим ўзгаришининг таъсири кенг тарқалган. Унинг сўзларига кўра, қурғоқчилик, сув тошқини ва бошқа табиий офатлар инсонларга зарар етказмоқда.Озиқ-овқат тизимини мустаҳкамлаш эса ҳозирда ҳар қачонгидан ҳам муҳимроқдир.
Манбага кўра, Германиянинг 15 миллион евролик ёрдам пакети 150 минг афғон фуқароларини озиқ-овқат билан таъминлашга ёрдам беради.
Гуманитар ёрдам, шунингдек, тиббий ва санитар воситалардан иборат эканлиги ҳам айтилган.
Жаҳон озиқ-овқат дастурига кўра, Германия Афғонистонга 2022 йилда 167 миллион евро, 2021 йилда эса 145 миллион евро ажратган. Бу давлат Афғонистондаги Жаҳон озиқ-овқат дастурига энг кўп ҳисса қўшаётган беш давлат қаторига киради.
Изоҳ (0)