Хива туманида икки инсоннинг ўлимига сабаб бўлган йўл-транспорт ҳодисаси юзасидан айбдорга нисбатан суд ҳукми ўқилди. Бу ҳақда ИИВ Йўл ҳаракати хавфсизлиги хизмати хабар берди.
Маълум қилинишича, 2023 йилнинг декабрь ойида Хива туманида Cobalt ҳайдовчиси спиртли ичимлик истеъмол қилиб, машинани бошқарган ва йўлда кетаётган ака-укаларни ва яна бир нафар вояга етмаган шахсни уриб юборган. ЙТҲ оқибатида ака-ука Ҳасан ва Ҳусан воқеа жойида вафот этган.
15 декабрь куни тўйга бориб, у ерда спиртли ичимлик истеъмол қилиб, рулга ўтирдим. Уйга қайтаётиб, йўл четидаги болаларни уриб юборганман. Кейин воқеа жойидан кетиб қолганман. Қилган ишимдан пушаймонман. Болаларнинг оила аъзоларидан кечирим сўрайман, — дейди судланувчи.
Жиноят ишлари бўйича Хива туман суди ҳукми билан судланувчи эркак Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси (хавф остида қолдириш) билан айбли деб топилиб, унга 9 йил 1 ой озодликдан маҳрум этиш жазоси тайинланди.
Бир неча кун олдин Хоразмда вояга етмаган қизлар “ҳайдашни ўрганамиз” деб катта тезликда юриб машина билан ағдарилиб кетгани тўғрисида хабар берилганди.
Изоҳ (0)