Xiva tumanida ikki insonning o‘limiga sabab bo‘lgan yo‘l-transport hodisasi yuzasidan aybdorga nisbatan sud hukmi o‘qildi. Bu haqda IIV Yo‘l harakati xavfsizligi xizmati xabar berdi.
Maʼlum qilinishicha, 2023-yilning dekabr oyida Xiva tumanida Cobalt haydovchisi spirtli ichimlik isteʼmol qilib, mashinani boshqargan va yo‘lda ketayotgan aka-ukalarni va yana bir nafar voyaga yetmagan shaxsni urib yuborgan. YTH oqibatida aka-uka Hasan va Husan voqea joyida vafot etgan.
15-dekabr kuni to‘yga borib, u yerda spirtli ichimlik isteʼmol qilib, rulga o‘tirdim. Uyga qaytayotib, yo‘l chetidagi bolalarni urib yuborganman. Keyin voqea joyidan ketib qolganman. Qilgan ishimdan pushaymonman. Bolalarning oila aʼzolaridan kechirim so‘rayman, — deydi sudlanuvchi.
Jinoyat ishlari bo‘yicha Xiva tuman sudi hukmi bilan sudlanuvchi erkak Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) va 117-moddasi (xavf ostida qoldirish) bilan aybli deb topilib, unga 9 yil 1 oy ozodlikdan mahrum etish jazosi tayinlandi.
Bir necha kun oldin Xorazmda voyaga yetmagan qizlar “haydashni o‘rganamiz” deb katta tezlikda yurib mashina bilan ag‘darilib ketgani to‘g‘risida xabar berilgandi.
Izoh (0)