Тошкентда Toyota Camry ҳайдовчиси содир этган ЙТҲда Хитой фуқаролари жароҳатланди

Тошкентда йўл-транспорт ҳодисаси содир этиб, беш кишининг тан жароҳати олишига сабаб бўлган 18 ёшли ҳайдовчи жавобгарликка тортилди.

Қайд этилишича, жиноят ишлари бўйича Тошкент шаҳри Миробод тумани судининг 5 март куни бўлиб ўтган йиғилишид Toyota Camry ҳайдовчиси — 18 ёшли Н.Т.га нисбатан иш кўриб чиқилган.

“Газета.уз”нинг ёзишича, 2023 йилнинг 20 ноябрь куни Буюк Британиянинг Бангор университети 2-курс талабаси, Бухоро вилоятида туғилган 18 ёшли йигит Абдулла Қодирий кўчаси бўйлаб 80−85 км/соат тезликда ҳаракатланган. Хавфли қувиб ўтиш манёврини амалга оширган ва бошқа машина билан тўқнашишнинг олдини олишга уриниб, чапга бурилган, оқибатда бетон бордюрга урилган. Машина ағдарилиб, қарама-қарши йўлакдаги Nexia билан тўқнашган. Автомобильда транспорт воситасини рўйхатдан ўтказиш гувоҳномаси бўлмаган.

Ҳодиса оқибатида Nexia ҳайдовчиси ва ундаги тўрт нафар Хитой фуқароси жабрланган. Уларда турли хил синишлар, мия чайқалиши ва бошқа жароҳатлар (жигар ўнг бўлагининг ёрилиши, қориннинг ёпиқ шикастланиши, бош миянинг ёпиқ синиши, гематома, гемоperitoнеум, 3-даражали травматик шок, пост-травматик анемия ва бошқалар) юзага келган. Икки нафари ўртача оғирликдаги, яна икки нафари оғир, ҳаёт учун хавфли бўлган жароҳатлар олган.

Nexiaъга етказилган зарар 28 миллион 280 минг сўмни ташкил этган. Toyota ҳайдовчиси ўз айбига тўлиқ иқрор бўлиб, кечирим сўраб, жабрланувчиларга даволаниши ва бошқа харажатлари учун 200 миллион сўм тўлаганини айтган. У суддан “оилавий ва моддий аҳволини” инобатга олган ҳолда жазони енгиллаштиришни сўраган.

Nexia ҳайдовчиси етказилган зарар тўлиқ қопланганини тасдиқлаган. У судланувчига нисбатан ҳеч қандай шикояти йўқлигини айтиб, суддан жазони енгиллаштиришни сўраган.

Суд қарори билан фуқаро Н.Т. Жиноят кодексининг 266-моддаси 1-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш, баданга ўртача оғир ёки оғир шикаст етказилишига сабаб бўлса) билан айбдор деб топилиб, 1 йил муддатга автомашина бошқариш ҳуқуқидан маҳрум қилинган. Шунингдек, давлат фойдасига БҲМнинг 10 баравари (3,3 миллион сўм) миқдорида жарима ундирилган.

Аввалроқ Андижон вилояти Шаҳрихон туманида Cobalt машинаси ёниб кетгани, Андижонда йўл четида турган Nexia'да ёнғин чиққани, Қамчиқ довонида лак-бўёқ ортилган юк машинаси ёниб кетиши оқибатида бир неча киши жабрлангани тўғрисида хабар берилганди. Шунингдек, Қашқадарёда Damas билан тўқнашган Captiva ёниб кетганди.