ДХХ ходимлари томонидан Тошкент халқаро аэропортининг назоратчиси 1,8 минг доллар олган вақтида ушланди, деб хабар беради ЎзА.
Қайд этилишича, Тошкент халқаро аэропортининг Авиация хавфсизлик хизмати қўриқлаш назоратчилар бўлинмаси назоратчиси А.Б. хизмат мавқейидан фойдаланган ҳолда ўзганинг ишончига кириб, унинг пул маблағини ноқонуний тарзда ўзлаштиришни режа қилган.
Дастлаб у ижтимоий тармоқ орқали жабрланувчи билан танишган ва унинг қариндошини Тошкент халқаро аэропортининг Авиация хавфсизлик хизмати қўриқлаш назоратчилар бўлинмасига назоратчи сифатида ишга киритиб қўйиш эвазига 2 минг доллар талаб қилган. Лекин, жабрланувчи 1,8 минг доллар беришини маълум қилган.
2023 йилнинг 6 декабрь куни Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда, А.Б. 1,8 минг долларни олган вақтида ашёвий далиллар билан ушланган.
Ҳолат юзасидан А.Б. га нисбатан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари олиб борилди. Жиноят ишлари бўйича Миробод туман суди томонидан эса А.Б. га нисбатан 2 йил муддатга озодликни чеклаш жазоси тайинланган.
Бундан олдин Самарқандда Миллий гвардияга ишга киритиб қўйишни ваъда қилиб, 27 минг АҚШ долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2 000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Изоҳ (0)