Канада 2035 йилга келиб мамлакатдаги барча автомобилларни электромобилга алмаштирмоқчи. Талабларга кўра, 2026 йилда мамлакатда янги автомобиллар сотувининг камида 20 фоизи электр, водород ва токка уланадиган электр транспорт воситаларига тўғри келиши керак.
2030 йилга келиб бу фоиз 60 фоизга, 2035 йилда эса 100 фоизга ошади. Автомобиль ишлаб чиқарувчилари ва дистрибюторлари ушбу фоизларни кафолатлашлари керак.
Ушбу ҳаракат қазиб олинадиган ёқилғида ишлайдиган транспорт воситаларини босқичма-босқич тўхтатишга қаратилган.
Автомобиль ишлаб чиқарувчилари сотилган электромобиллар сонига қараб кредитлар билан рағбатлантирилади, энг экологик тоза автомобиллар эса кўпроқ кредит олади. Компаниялар, шунингдек, янги қоидалар 2026 йилда кучга киргунга қадар, зарядлаш инфратузилмани яратиш ва кўпроқ электр транспорт воситаларини жорий этишга сармоя киритиш учун кредит олишлари мумкин.
Куни кеча АҚШ бензинда юрадиган автомобиллар учун зарарли чиқинди газлар бўйича стандартларни қатъийлаштирди.
Янги стандартлар 2027–2032 йилларда ишлаб чиқариладиган енгил ва тижорат транспорт воситаларига (юк машиналари бундан мустасно) нисбатан қўлланилади. Амалдаги стандарт билан солиштирганда, енгил автомобиллар учун рухсат этилган чиқиндилар 2026 йилда 50 фоизга, ўрта юк автомобиллари учун эса 44 фоизга камаяди.
IEA маълумотларига кўра, 2022 йилда дунё бўйлаб йўлларда 26 миллион электр транспорт воситаси бўлган, бу 2021 йилга нисбатан 60 фоизга кўп. Бу электр транспорт воситаларига юқори талабдан далолат беради, бу ҳам харидорлар, ҳам ишлаб чиқарувчилар учун барча турдаги субсидиялар ва имтиёзлар билан боғлиқ.
Йирик автомобиль ишлаб чиқарувчилар аллақачон ички ёнув двигателли транспорт воситаларини босқичма-босқич тугатишни режалаштирмоқда. Мазкур чоралар натижасида 2035 йилгача 430 миллион тонна иссиқхона газлари атрофга тарқалишининг олди олиниши кутилмоқда.
Изоҳ (0)