Исроил армияси Ливан жанубига фосфорли бомбалар ташламоқда — Al Jazeera

Исроил кучлари Ливан жанубидаги объектларга фаол равишда фосфорли бомбалар ташламоқда. Бу ҳақда Al Jazeera нашри хабар берди.

Манбада айтилишича, Байрутдаги Америка университети атроф-муҳит кимёси тадқиқотчиси Аббос Баалбакий деярли олти ой давомида Исроил томонидан Ливан тупроғига ташланган фосфорли хариталар билан боғлиқ маълумотларни ўрганиб чиққан. Ўрганишга кўра, фосфор бомбаси қўллаш билан боғлиқ 40 га яқин ҳолат аниқланган.

Ливан жанубига биринчи фосфорли ҳужум ўтган йилнинг 17 октябрида рўй берган. Шу куни Исроил кучлари Кфар Кила шаҳри осмонида фосфорли бомбалар портлатган.

Ливанга ташланган оқ фосфор, Баалбакийнинг фикрича, фаол, жуда заҳарли ва ёнувчан бўлиб, узоқ вақт давомида сақланиб қолади. Ушбу кимёвий элемент билан заҳарланган ҳудуднинг тозаланиши жуда қийин бўлади.

Ливан Миллий илмий тадқиқотлар кенгаши маълумотларига кўра, 6 март санасига қадар Ливан жанубига 117 та фосфорли бомба ташланган. Март ойи охирига келиб бундай турдаги бомбалардан фойдаланиш коэффициенти ошган.

Манбалар Исроил фосфорли бомбалардан аҳолини мажбурий кўчириш учун фойдаланаётганини айтган. Чунки бу бомба портлаган ҳудудда нафас олиш ва 15 дақиқадан ортиқ қолишнинг имкони йўқ.