Москва Ғарб билан келишишга тайёр, лекин бу келишув ҳаққоний бўлиши ва Россия Федерациясининг қонуний манфаатларини кафолатлаши керак. Бу ҳақда Россия ташқи ишлар вазири Сергей Лавров “ТАСС” нашрига маълум қилди.
Олдинроқ президент Владимир Путин журналистларга берган интервьюсида Россия аллақачон Ғарбга ишонишни тўхтатгани ҳақида хулоса берган эди. Сергей Лавров эса ушбу баёнот дипломатик алоқалар музлаганига ишора қилмаслигини билдириб ўтган.
“Биз бўлиб ўтган ҳамма ишга қарамай, барибир гаплашишга тайёрмиз, лекин шаффоф тарзда, алдамасдан, ҳукмрон воқелик ва ўзимиз шакллантирган қонуний манфаатларимизни тўлиқ ҳисобга олган ҳолда”, — деган Россия ташқи идораси расмийси.
Аввалроқ Лавров Россия ва Ғарб давлатлари ўртасида бундан буён аввалги форматдаги муносабатлар бўлмаслигини, Москва халқаро ҳужжатларни имзолашда Ғарбнинг унга нисбатан уюштирадиган тузоқларига йўл бермаслигини таъкидлаган эди. Ушбу баёнот амалда ихтилофнинг икки томони ўртасидаги келишув эҳтимолини пучга чиқариб қўйган эди.
Изоҳ (0)