Санкт-Петербург суди 20 март куни Кремлнинг Украинадаги ҳарбий ҳаракатларини танқид қилган кинорежиссёрни 3 йиллик қамоқ жазосига ҳукм қилди. Бу ҳақда The Moscow Times нашри хабар берди.
Хабарда айтилишича, 36 ёшли Всеволод Королёв 2022 йил июлидан бери Россия қуролли кучлари ҳақида атайин ёлғон маълумот тарқатишда гумонланиб, тергов ҳибсхонасида сақланиб келаётган эди. Эндиликда суд гумонланувчига нисбатан ҳукм чиқарган.
Санкт-Петербургнинг Виборгский туман суди Всеволод Королёвни 2022 йил баҳорида “ВКонтакте” ижтимоий тармоғида Буча ва Бородианкада тинч аҳолининг қирғин қилиниши, шунингдек, Донецкнинг ўққа тутилиши борасида ҳақиқатга тўғри келмайдиган постлар жойлаганликда айбдор деб топган.
Суд айбланувчига нисбатан умумий режимдаги колонияда ўталиши мўлжалланган уч йиллик қамоқ жазоси тайинлаган. Шунингдек, унга 4 йил давомида интернетдан фойдаланиш тақиқлаб қўйилган.
Россия қонунчилигига кўра, Украина ҳақидаги расмий ҳукумат манбасидан олинмаган маълумотлар “ёлғон” деб топилиши мумкин ва унинг тарқатилиши жиноий жавобгарликка тортишга асос бўлади.
Россиянинг жанубий Волгоград вилояти суди ҳам худди шу ҳолат бўйича фуқарони ёлғон маълумот тарқатганликда айблаб, беш йилга озодликдан маҳрум қилиш тўғрисида ҳукм чиқаргани маълум қилинган.
Изоҳ (0)