Қўшма Штатлар Теҳроннинг баллистик ракета синовлари ва ядровий фаолиятидан хавотир билдирган ҳолда мамлакатга нисбатан янги санкциялар жорий қилди. Бу ҳақда IRNA нашри маълум қилди.
Хабарда айтилишича, 20 март куни АҚШ Молия вазирлиги таркибидаги Хорижий активларни назорат қилиш идораси Эроннинг баллистик ракета, ядровий ва мудофаа дастурларини қўллаб-қувватлаганликда гумон қилинган учта харид тармоғига нисбатан санкциялар жорий этган. Ушбу тармоқлар Эрон, Туркия, Уммон ва Германияда фаолият юритади.
АҚШ расмийлари санкция киритилган корхоналар тармоғи Эроннинг ракета саноати учун углерод толаси, эпокси қатрони ва бошқа материалларни харид қилиш билан шуғулланганини даъво қилган.
Олдинроқ АҚШ президенти Жо Байден Эронга нисбатан дипломатик ёндашув ижобий томонга ўзгариши ва 2015 йилги ядровий келишувларга қайтилишини маълум қилган эди. Бироқ дипломатик муносабатлар кайфияти ўзгармади. Эронга нисбатан эса янги санкциялар жорий қилишда давом этилмоқда.
Изоҳ (0)