“Ҳизбуллоҳ” ҳужумларида 17 нафар Исроил аскари ҳалок бўлди — IRNA

Ливандаги “Ҳизбуллоҳ” ҳаракатининг Исроил шимолига берган зарбалари оқибатида шу пайтга қадар 17 нафар исроиллик аскар ҳалок бўлган. Бу ҳақда Исроил манбаларига асосланиб, IRNA нашри хабар берди.

Хабарда айтилишича, 8 октябрдан бери “Ҳизбуллоҳ” гуруҳи Исроил шимолига 30 дан ортиқ ҳужум ташкил этган. Ҳудуддаги маҳаллий исроилликлар мамлакат ичкарисига эвакуация қилинган.

Ҳарбий ҳаракатлар давомида Ливан гуруҳи Тель-Авив ҳудудига 3500 га яқин ракета учирган. Шу билан бирга, Сурия ҳудудидан ҳам оккупация қилинган Фаластин шимолига шу пайтга қадар жами 38 ракета йўналтирилган.

Исроил ҳарбийлари ҳалок бўлган ҳарбийлар сонини 17 нафар деб белгилаган. Яраланганлар ҳақида маълумот тақдим этилмаган.

Ливаннинг Ал-Манар нашрига кўра, сўнгги кеча-кундузда қаршилик гуруҳи икки аҳоли пунктида исроиллик аскарларни ракеталар билан нишонга олган. Шунингдек, улар Ливан билан чегарада жойлашган Ал-Бағдодий ҳудудида Исроил зирҳли машиналарини йўқ қилган.

“Ҳизбуллоҳ” асосан Исроилнинг ҳарбий позициялари ва жосуслик иншоотларини нишонга олганини, режим Ғазога қарши қонли урушни тўхтатмагунча операцияни давом эттиришини қайта-қайта таъкидлаган.