Сурхондарё вилояти Бойсун туманида фуқаро терговчилар уни электр токи билан қийнаганини айтди. Вилоят прокуратураси ҳолатга изоҳ берди.
Аниқланишича, Бойсун туманида яшовчи фуқаро А.А. ўзининг мурожаатида жияни М.А.ни жорий йилнинг 10 январь куни туман ИИБ ходимлари уриб, тан жароҳати етказганини маълум қилган. Ҳолат юзасидан туман прокуратураси томонидан терговга қадар текширув ҳаракатлари ўтказилган.
Терговга қадар текширув давомида фуқаро М.А.нинг 10 январда туман ИИБ биносига кириб чиққани тегишли тартибда қайд қилинган. Унинг келиши ва бинони тарк этиши ҳамда сўров-суҳбатхонасида суҳбат ўтказиш жараёнлари туширилган видеотасвир процессуал тартибда расмийлаштириб олиниб, кўздан кечирилганда, фуқаро М.А. соғлом ҳолатда келиб, соғлом ҳолатда ИИБ биносини тарк этгани аниқланган.
Шунингдек, вилоят ИИБ томонидан ҳолат бўйича ўтказилган идоравий хизмат текшируви хулосасига кўра, туман ИИБ ходимларининг ҳаракатларида қонунбузилиши ҳолатлари аниқланмаган.
Бундан ташқари, суд-тиббий экспертизаси текшируви давомида фуқаро М.А.нинг баданидаги енгил тан жароҳати етказилган вақти фуқаро баён қилган вақтга мос келмаслиги кўрсатиб ўтилган.
Терговга қадар текширув натижасига кўра, бирор-бир шахснинг ҳаракатларида жиноят таркиби аниқланмагани сабабли Жиноят процессуал кодексининг 83-моддаси 2-бандига асосан жиноят иши қўзғатишни рад этиш ҳақида қарор қабул қилинган.
Изоҳ (0)