Фарғона вилояти Учкўприк туманида ота-болани ички ишлар ходимлари калтаклагани ҳақида хабарлар тарқалди. Вилоят ИИБ ҳолат юзасидан баёнот берди.
Аниқланишича, жорий йилнинг 4 март куни Учкўприк тумани ИИБ ходими М.Э. Жиноят кодексининг 104-моддаси 2-қисмида кўрсатилган жиноятни содир этгани учун суд томонидан озодликни чеклаш жазоси тайинланган Катта Кенагас қишлоғида яшовчи, 1999 йилда туғилган маҳкум М.А.нинг тунда чекловга амал қилаётганини ИИВнинг тегишли буйруқ талаблари асосида текшириш учун холислар иштирокида соат 23:00 да уйи ёнига бориб, уйида экани сабабли профилактик суҳбат ўтказган.
Бироқ маст ҳолда бўлган фуқаро М.А. ИИО ходимининг ҳаракатидан норози бўлиб, шу куни соат 23:30 ларда отаси Х.Ж. билан бирга туман ИИБга ўзлари келган (ИИО ходимлари уларни чақиртирмаган). Асоссиз равишда уни уйига келиб профилактик суҳбат ўтказган ходим М.Э.ни маст ҳолатда хизмат олиб бормоқда деб, ички ишлар биносига белгиланган қоидаларга амал қилмасдан кирмоқчи бўлган.
Шунда маъмурий бинонинг назорат-ўтиш жойида хизмат олиб бораётган ИИО ходими Э.А. томонидан белгиланган тартиб-қоидаларга амал қилиши кераклиги тушунтирилган. Қонуний талабга бўйсунмасдан, асоссиз равишда бақир-чақир қилишиб, ҳақоратли сўзлар ишлатишиб, ходимга ташланишган вақтда, уларнинг ноқонуний хатти-ҳаракатлари ИИО тўғрисидаги қонун ва меъёрий буйруқ талаблари асосида тўхтатилиб, ҳолат бўйича ҳужжатлар расмийлаштирилган.
Аммо ушбу фуқаролар ИИО ходимлари уларни уриб, тан жароҳати етказгани ҳақида туман тиббиёт бўлимига мурожаат қилган. Ҳозирда Учкўприк тумани прокуратураси томонидан терговга қадар текширув ҳаракатлари олиб борилмоқда.
Маълумот ўрнида: Наркология диспансерининг шу кунги маълумотномасида ходим М.Э.да алкоголдан мастлик ҳолати аниқланмаган.
Изоҳ (0)