Олий Мажлис Қонунчилик палатасида “Спорт соҳасида коррупциянинг олдини олиш мақсадида Ўзбекистон Республикасининг Жиноят кодексига қўшимчалар киритиш тўғрисида”ги қонун лойиҳаси биринчи ўқишда консептуал жиҳатдан кўриб чиқилиб, қабул қилинди.
-AtBmN2UG.jpg)
Мазкур қонун лойиҳаси билан Жиноят кодексининг айрим нормаларига ўзгартириш ва қўшимчалар киритилмоқда. Яъни спорт мусобақалари иштирокчилари ва ташкилотчиларининг қонунга хилоф равишда моддий қимматликлар олиши ёки мулкий манфаатдор бўлиши, спорт мусобақалари иштирокчилари ва ташкилотчиларини пора эвазига оғдириб олиши учун жиноий жавобгарлик белгиланмоқда.
Мазкур қонун лойиҳаси 2023 йилнинг декабрида Ўзбекистонда илк маротаба ўтказилган “Коррупцияга қарши курашиш бўйича юксак халқаро мукофот” билан тақдирлаш маросими доирасида Шавкат Мирзиеёв томонидан белгиланган вазифалар асосида ишлаб чиқилган 2024—2026 йилларга мўлжалланган “йўл харитаси” ижроси доирасида ишлаб чиқилган.
Депутатларнинг қайд этишича, қонун лойиҳасининг қабул қилиниши миллий қонунчиликни замонавий халқаро стандартлар ва илғор хорижий тажрибани инобатга олган ҳолда такомиллаштиришга, спорт соҳасида коррупцияга нисбатан муросасиз муносабатни шакллантиришга, барча учун жавобгарликнинг муқаррарлигини таъминлашга, Ўзбекистоннинг халқаро рейтинглардаги ўрни кўтарилишига хизмат қилади.
Изоҳ (0)