Рамазон ойида ортиқча вазн пайдо бўлмаслиги учун нима қилиш лозим? Мутахассис тавсияси

Рамазон ойи кириб келганда кундалик овқатланиш тартибидаги ўзгаришлар организм учун кичик синов бўлиб, баъзи инсонлар ортиқча овқатланиш сабабли вазн орттиради. Гарчи бу ғалати туюлса-да, кўплаб мусулмонлар буни бошидан кечириши ҳақиқат.

Рўза вақтида семиришга нафақат калорияли ва ёғли таомлар, балки уйқу режимининг ўзгариши ва камҳаракат бўлиш каби омиллар ҳам сабаб бўлади. Бундай ҳолатнинг олдини олиш учун нима қилиш лозим? Бу ҳақда Harper’s Bazaar нашри ўз тавсиясини берди.

Овқатланиш тартиби

Диетолог ва нутрициологлар таъкидлашича, рўзадор инсонлар қайта ишланган маҳсулотлар, қовурилган, ёғли, шўр, дудланган таомлар ва ширинликлардан воз кечиши яхшироқдир. Уларнинг ўрнига танани энергия, озуқа моддалари ва етарли миқдорда сув билан таъминлайдиган маҳсулотларни танлаш лозим.

Парҳез мутахассислари тавсия этишича, мураккаб углеводлар манбаи сифатида донли маҳсулотлар, мол гўшти, товуқ, курка, балиқ, дуккаклилар ва тофу каби оқсилга бой маҳсулотлар узоқ вақтга организмни тўқ тутади ва энергия беради.

Авокадо, ёнғоқлар, уруғлар, зайтун мойи каби фойдали ёғларни ўз ичига олган маҳсулотлар кун давомида ҳолсизликка чалинмасликда ёрдам беради.

Сувсизланишнинг олдини олиш учун диетологлар мева, сабзавотларни таомномага киритиш ҳамда керакли миқдорда сув ичишни маслаҳат беради.

Жисмоний фаоллик

Рамазон ойида ортиқча вазн тўпланишининг олдини олиш учун спорт билан шуғулланишни тўхтатманг. Асосийси, бадантарбиядан воз кечмаган ва умумий чарчоқ даражасини ҳисобга олган ҳолда жисмоний фаол бўлиш лозим. Масалан, енгил югуриш, сузиш, йога кабилар юракка оғир юклама бермайдиган спорт турларидир.

Муҳим жиҳат: жисмоний машқлар оғиз очилгандан сўнг саҳарликка қадар бўлган вақтда бажарилиши керак. Шу тарзда сиз соғлом вазнни сақлаб қоласиз ва рўза тутишда қийинчиликка дуч келмайсиз. Кун давомида эса шифокорлар очиқ ҳавода пиёда юриш каби оддий машғулотларни бажаришни тавсия қиладилар.

Уйқу

Рамазон ойида мусулмон аҳолининг ибодат қилиш вақти кўпаяди ва бу уйқу сифатига таъсир қилади. Уйқуга тўймаслик зарарли таомларга бўлган эҳтиёжни орттиради. Шу сабабли бутун кунни режа билан ўтказиш, барча ишларга улгуришда ва соғлом ҳаёт кечиришда муҳим аҳамиятга эга.