“Бирорта дарахт кесмаслик шарти билан савдо маркази қурилади”. Пахтакор ва Алишер Навоий кинотеатри ўртасидаги қурилишга изоҳ берилди

Telegram мессенжеридаги каналларда Тошкент шаҳрининг Шайхонтоҳур туманида жойлашган Пахтакор стадиони ва Алишер Навоий кинотеатри ўртасида савдо маркази қурилаётгани, шу сабаб мавжуд “стоянка” бузилиб, ҳудуддаги дарахтлар кесилиши тахмин қилингани айтилган видеолар тарқалганди.

“Дарё” журналисти ҳолатга аниқлик киритиш мақсадида воқеа жойига бориб, ўрганиш олиб борди. 

“Стоянка” атрофида кабел ўрнатиш ишларини олиб бораётган Шайхонтоҳур туман электр тармоқлари корхонаси ходимларининг билдиришича, ҳудудда автомобиллар учун замонавий тураргоҳ, шунингдек савдо маркази қурилиши мумкин.

Бундан ортиғини билмаймиз. Ташкилотимизга мурожаат қилишиб, шу ерда кабел ўтказишимиз сўралган экан. Шу ишлар билан машғулмиз, — дейди журналист билан мулоқотда бўлган ишчилар.

Ўзининг Аббос исмли қурувчи эканини тасдиқлаган суҳбатдош жамоатчиликнинг ҳудудда савдо маркази қурилиши мумкинлиги ҳақидаги тахминини тасдиқлади. 

Ҳа, ҳудудда савдо маркази қурилади. Фақат бирорта ҳам дарахтни кесмаслик шарти билан. Кўпчилик буни ҳар хил талқин қилиб, энди “стоянка” бузилар экан, дарахтлар кесилар экан деган маълумотларни тарқатишмоқда, — дейди Аббос исмли суҳбатдош.

Қурувчининг айтишича, тармоқларда тарқалган видеолардан сўнг масъуллар, хусусан Тошкент шаҳар Кадастрлар палатаси масъуллари, шаҳар Экология бошқармаси ходимлари ҳудудга келиб, вазиятни ўрганган.

Бизда қонуний рухсатнома бор. Ўша видеолар тарқалгач, ёнимиздаги кадастр ходимлари, шаҳар Экология бошқармаси ходимлари бу ерга келиб, ҳолатни ўрганишди. Бизда қонуний рухсат борлигини кўришди ва қайтиб кетишди, — дейди суҳбатдош.

Масъулнинг маълумот беришича, савдо маркази эски “стоянка” ўрнида 20 сотих майдонда қурилиши режалаштирилган. 

Бу ерда савдо маркази қурилишига рухсат берилаётган пайтда бизга эски “стоянка” ўрнига замонавий, аҳоли учун бепул тураргоҳ қуриб бериш мажбуриятини юклашган. Тўғри, биз савдо маркази учун ҳам пулли “стоянка” қурамиз. Савдо марказида 2 та “стоянка” бўлади. Бири бепул бўлиб, эски “стоянка” ўрнида одамларга берилади, — дейди ҳудудда қурилиш ишларини бошлаганини айтган масъул. 

Журналист билан мулоқотга киришган масъул ҳудудда қурилиш ишларини олиб бориши учун тегишли ташкилотларнинг қарори, рухсатномаси борлигини айтар экан, улардан нусхалар ҳам тақдим қилишини билдирди. Бироқ ваъда қилинган фурсат ўца-да, ҳеч қандай ҳужжат кўрсатилмади. 

Мен аслида қурувчиман. ОАВга ҳужжат тақдим этиш масаласида буюртмачига билдирдим. Улардан рухсат сўрашим керак. Менга ҳужжатлар тақдим этишга рухсат беришса, сизларга албатта ҳужжатларни тақдим қиламиз, — дейди Аббос исмли суҳбатдош. 

Қурувчи савдо маркази қурилишига буюртма берган томонни ҳозирча очиқламади. 

“Дарё” воқеа тафсилотларини ўрганишда давом этади.