Олий Мажлис Қонунчилик палатаси спикери ўринбосари, “Миллий тикланиш” демократик партияси фракцияси раҳбари Алишер Қодиров мактабда ўқитувчида эркинлик, ўқувчида интизом бўлиши шартлиги ҳақида гапирди.
Унинг сўзларига кўра, Миллий гвардия мактабларда профилактик ишларни амалга оширишни бошлаганидан кейин қисқа вақт ичида 124 минг ўқувчи сабабсиз мактабга келмагани аниқланган. Таъкидланишича, 3 минг нафар ота-она Маъмурий жавобгарлик тўғрисидаги кодекснинг 47-моддаси билан жаримага тортилган.
“Бу жазо шикоят бўлмагани учун деярли қўлланмаган. Мактабни ҳам тушуниш керак болани ўқицинми, ота-онаси билан тортишсинми… Ғарб йўқотилган авлод оила ва таълимда қадриятларни рад этиш натижаси эканини тан олмоқда”, — деб ёзади у.
Алишер Қодировга кўра, тарбия масаласида кескин қарорлардан қочмаслик керак. “Миллий тикланиш” етакчиси мактабни тугатган, ўқишга кирганлардан ташқари барча ўғил болаларни тўловларсиз, бир йиллик мажбурий ҳарбий хизматга жалб қилиш лозимлигини таъкидлади.
“Тартиб ва масъулиятни мактаб ва ҳарбий хизматда ўргатмасак, қамоқхонада ҳеч қачон ўргатиб бўлмайди. Ўзбекистонни эркинликни ҳадсизлик деб биладиган, атлас костюм хунасалар эмас, ўз қадрини биладиган, тафаккур қиладиган ўғил-қизлар ривожлантиради.
Нафақат Ўзбекистон, балки бутун Марказий Осиёда боғча ва мактаб миллий хавфсизлик масаласига айланган. Уни нафақат Миллий гвардия, балки, бутун жамият қўриқлаши керак”, — дейди у.
Изоҳ (0)