Олий Мажлис Қонунчилик палатасининг “2024 йил учун Ўзбекистон Республикасининг Давлат бюджети тўғрисида”ги қонун лойиҳасининг муҳокамасига бағишланган мажлисида “Миллий тикланиш” демократик партияси фракцияси раҳбари Алишер Қодиров ўқитувчиларга ажратилаётган бюджет маблағларининг самарадорлиги паст бўлаётганини айтиб ўтди.
“Мактабгача ва мактаб таълими вазирлигининг жорий харажатлари учун ажратилган маблағнинг 80 фоизга яқини, яъни 35 триллион сўмга яқин маблағ фақатгина ўқитувчиларнинг ойлик маошига йўналтирилмоқда.
Биз ўқитувчиларга юқори маош тўлаш ҳақидаги фикрни жамиятга илгари сурдик. Ҳақиқатан ҳам шундай бўлиши керак. Ўқитувчи юқори маош олиши керак. Чунки ўқитувчи келажакни яратади. Биз ўзимиз томонимиздан “Педагогларнинг мақоми тўғрисида”ги қонунни қабул қилдик. Уни мақом ва қонуний ҳимояси нуқтаи назаридан ишлаяпмиз. Лекин маблағ камаймаяпти, кўпайгандан кўпаймоқда. Нима учун ўқитувчиларга яратилаётган шу шароит бизга янги келажак умидларини уйғотиб беролмаяпти? Нима учун олий таълим муассасаларига топширган абитуриентларнинг 50 фоизга яқини ҳатто 2 баҳога лойиқ бўлган кўрсатгични ҳам қайд этолмади?
Афсус билан айтиш керак сарфланаётган маблағларимиз ва киритаётган инвестицияларимиз ўз самарасини, натижасини кўрсатмаяпти. Биз кўп пул сўраётганимиз йўқ, пулни оширинглар ёки кўпайтиринглар, деб сўраётганимиз йўқ. Берилаётган маблағнинг натижадорлиги ҳақида гапиряпмиз.
Ўқитувчиларга 35 триллион сўмга яқин ойлик бериляпти, 500 минг нафарга яқин ўқитувчиларимиз бор. Биздаги таҳлилларимизга қарагандан 10-15 фоиз атрофида ўқитувчиларимизда ортиқчалик бор, яъни мактабда зарурат бўлмаган муаллимлар ҳам ишлаяпти. Биз ҳали сифат ҳақида гапираётганимиз йўқ”, — деди Алишер Қодиров.
Унинг алоҳида таъкидлашича, ўқитувчи бугунги ўқувчига кутилаётган илмни беролмаётганлигининг сабаблари жуда кўп.
“Ўқитувчини айблаш энг осон йўл. Лекин болалар шаклланиши жуда тезлашиб кетди. Ўқитувчи конспект тайёрлаб, 1-2 кун кетказиб тайёрлаган маълумотни ўқувчи 5 сонияда интернет орқали олиб қўймоқда, замон шунчалар тезлашди. Энди ўқитувчи замонга мослашиши керак. Педагогик методолгия ўзгариши керак.
Бизни таклифимиз бўлардики, давлат раҳбари томонидан бевосита эътибор қаратилаётган таълим-тарбиядаги ислоҳотларда қўйилаётган инвестицияларнинг самарадорлиги ҳақида вазирлик жуда жиддий бош қотириши керак.
Ўқитувчиларни малакасини ошириш, уларга юқори иш ҳақи бериш билан биргаликда уларнинг бугунги кундаги замонавий талабларда ишини тўғри баҳолаш тизимни яратишимиз керак. Буни инсон омилини аралаштирмасдан қиламиз, деган гапга вазир ўринбосари “Қийин масала” деб айтдилар. Бутун битта камера орқали битта ўқитувчи фаолиятига баҳо бериш қийин эмас. Ўқитувчи 45 дақиқа давомида болаларга нима берди? Тўғри таълим бердими ёки нотўғри бердими, самарали дарс ўтдими ёки аксинча, деб баҳо бериш қийин эмас”, — деди “Миллий тикланиш” демократик партияси фракцияси раҳбари.
Аввалроқ бош вазир ўринбосари нима учун таркибида шакар бўлган газли ичимликларнинг бир литрига 500 сўм акциз солиғи солинаётганига изоҳ берган эди.
Изоҳ (0)