Ўзбекистон ва Франция қўшма киноасарлар яратиши мумкинлиги айтилди. Бу ҳақда Маданият вазирлиги хабар берди.
Маълум қилинишича, 18 март куни маданият вазири Озодбек Назарбеков Франциянинг мамлакатдаги фавқулодда ва мухтор элчиси Орелия Бушез билан учрашди. Учрашувда сўнгги йилларда Ўзбекистон ва Франция ўртасидаги ҳамкорлик алоқалари барча соҳалар қатори маданият ва санъат соҳасида ҳам тобора ривожланиб бораётгани қайд этилди.
Қайд этилишича, Шавкат Мирзиёевнинг Францияга, Франция президентининг мамлакатга амалга оширган ташрифлари доирасида эришилган келишувлар, ўтказилган қатор маданий тадбирлар мамлакатлар ўртасидаги муносабатлар ривожига хизмат қилаётгани ва бу борада маданият соҳасининг ўрни ва роли катта бўлаётгани эътироф этилди.
Учрашув давомида 2024 йилда Францияда Ўзбекистон маданияти кунларини ташкил этиш, Ўзбекистон ҳамда Франция Маданият вазирликлари ўртасида 2024–2026 йилларга мўлжалланган маданий ҳамкорлик дастурини имзолаш, кино соҳасида ҳамкорликни мустаҳкамлаш, қўшма киноасарлар яратиш каби қатор масалалар юзасидан фикр алмашилди.
Ўзбекистон томони бу йили ўтказиладиган “Лазги” рақс фестивали, “Мақом” халқаро анжумани ва “Шарқ тароналари” мусиқа фестивалида француз санъаткорларини ҳам фаол қатнашишга чақирди.
Изоҳ (0)