“Шунчаки юрагим йиғлади”. Таниқли журналист Муҳаббат Ҳамроева “Ёр-ёр” кўрсатувида бошқа чиқмаслигини маълум қилди

Таниқли тележурналист Муҳаббат Ҳамроева “Хизмат доирасидан ташқарисида” кўрсатувига берган интервьюсида “Zo‘r TV” телеканалидаги “Ёр-ёр” кўрсатувида бошқа бошловчилик қилмаслиги ҳақида сўзлаб берди.  


— “Ёр-ёр” кўрсатувидан кетдим. Бундан буёғига ким олиб борадиган бўлса ҳам омад тилайман. Менинг ўзимга яраша тактикаларим бор. Агар самолёт қаерга учиб боришини билсангиз, ўз вақтида парашютдан сакрашни ҳам билиш керак. Шу пайтгача кўрсатув орқали 2000 га яқин оила бунёд этилди. Кўрсатув “Zo‘r TV” маҳсулоти, муаллиф эса менман. Энди кўрсатув давом этар, лекин мен қатъий қарорга келдим, бошқа чиқмайман.

Кўрсатувга билдирилган танқидлар ҳақида

— Ҳар битта отиладиган тошларга эътибор бермайман, десам ёлғон бўлади. Кўксингизда токи юрак уриб турар экан қандай қилиб эътибор бермайсиз бундай гапларга? Танқидлар соғлиғимга қанчалик таъсир кўрсатганини ўзим биламан. Бизнинг халқимиз бундай кўрсатувларга тайёр эмас экан. Чунки бизда ҳаммаси ҳаққоний. Шундай экан, отилаётган танқид тошларнинг ҳар бири юрагимга теккан.

Россия халқ артисти Лариса Гузеева эътиборига тушгани ҳақида

— Эрталаб турсам, одамлар биз ҳақимизда бу уч ногирон ногиронларнинг устидан куляпти деб ёзишибди. Энди тасаввур қилинг, бизнинг ҳолатимизни? Мен-ку майли, лекин ёнимдаги иккита қариячи? Ўша изоҳ ёзаётган одамлар миллат учун нима қилган экан шу пайтгача, деб ўйлаб қолдим. Кейин бўлди, кўрсатувда бошқа чиқмайман, деган қарорга келдим. Лекин яна ўйлаб, “Тўхта Муҳаббат, ҳозир таслим бўладиган бўлсанг, арзимаган шамолга йиқиладиган бўлсанг, сен журналист эмассан”, дедим.  Шунда Яратгандан ўзи йўл кўрсатишини илтижо қилиб уйқуга ётдим. Тонгда телефонимни қўлимга олсам россиялик машҳур телебошловчи Лариса Гузееванинг кўрсатувига таклифнома келиб турибди. Шунчаки юрагим йиғлади. Россияга бориб, натижаларимиз билан ўртоқлашганимизда Лариса мени қучоқлаб “Ти просто молодчина!” деди. Шу эътирофнинг ўзи менга етарли.