“Shunchaki yuragim yig‘ladi”. Taniqli jurnalist Muhabbat Hamroyeva “Yor-yor” ko‘rsatuvida boshqa chiqmasligini ma’lum qildi

Taniqli telejurnalist Muhabbat Hamroyeva “Xizmat doirasidan tashqarisida” ko‘rsatuviga bergan intervyusida “Zo‘r TV” telekanalidagi “Yor-yor” ko‘rsatuvida boshqa boshlovchilik qilmasligi haqida so‘zlab berdi.  


— “Yor-yor” ko‘rsatuvidan ketdim. Bundan buyog‘iga kim olib boradigan bo‘lsa ham omad tilayman. Mening o‘zimga yarasha taktikalarim bor. Agar samolyot qayerga uchib borishini bilsangiz, o‘z vaqtida parashyutdan sakrashni ham bilish kerak. Shu paytgacha ko‘rsatuv orqali 2000 ga yaqin oila bunyod etildi. Ko‘rsatuv “Zo‘r TV” mahsuloti, muallif esa menman. Endi ko‘rsatuv davom etar, lekin men qat’iy qarorga keldim, boshqa chiqmayman.

Ko‘rsatuvga bildirilgan tanqidlar haqida

— Har bitta otiladigan toshlarga e’tibor bermayman, desam yolg‘on bo‘ladi. Ko‘ksingizda toki yurak urib turar ekan qanday qilib e’tibor bermaysiz bunday gaplarga? Tanqidlar sog‘lig‘imga qanchalik ta’sir ko‘rsatganini o‘zim bilaman. Bizning xalqimiz bunday ko‘rsatuvlarga tayyor emas ekan. Chunki bizda hammasi haqqoniy. Shunday ekan, otilayotgan tanqid toshlarning har biri yuragimga teggan.

Rossiya xalq artisti Larisa Guzeyeva e’tiboriga tushgani haqida

— Ertalab tursam, odamlar biz haqimizda bu uch nogiron nogironlarning ustidan kulyapti deb yozishibdi. Endi tasavvur qiling, bizning holatimizni? Men-ku mayli, lekin yonimdagi ikkita qariya-chi? O‘sha izoh yozayotgan odamlar millat uchun nima qilgan ekan shu paytgacha, deb o‘ylab qoldim. Keyin bo‘ldi, ko‘rsatuvda boshqa chiqmayman, degan qarorga keldim. Lekin yana o‘ylab, “To‘xta Muhabbat, hozir taslim bo‘ladigan bo‘lsang, arzimagan shamolga yiqiladigan bo‘lsang, sen jurnalist emassan”, dedim.  Shunda Yaratgandan o‘zi yo‘l ko‘rsatishini iltijo qilib uyquga yotdim. Tongda telefonimni qo‘limga olsam rossiyalik mashhur teleboshlovchi Larisa Guzeyevaning ko‘rsatuviga taklifnoma kelib turibdi. Shunchaki yuragim yig‘ladi. Rossiyaga borib, natijalarimiz bilan o‘rtoqlashganimizda Larisa meni quchoqlab “Ti prosto molodchina!” dedi. Shu e’tirofning o‘zi menga yetarli.