Ўтган йили Ўзбекистон кафолати остидаги хорижий кредитлар ҳисобидан 21,2 триллион сўм инвестициялар ўзлаштирилган. Бу ҳақда Статистика агентлиги маълумот берди.
Агентлик таҳлилига кўра, 2023 йилнинг январь–декабрь ойларида асосий капиталга жами 352,1 триллион сўмлик инвестициялар ўзлаштирилган. Шундан 21,2 триллион сўми Ўзбекистон Республикаси кафолати остидаги хорижий кредитлар ҳисобидан молиялаштирилган. Мазкур кредитларни ўзлаштиришнинг энг юқори улуши Тошкент шаҳрида (8,2 триллион сўм) қайд этилган. Энг паст кўрсаткич эса Жиззах вилоятида — 328,5 миллиард сўм.
Ўзбекистон кафолати остидаги хорижий кредитлар ҳисобидан молиялаштирилган асосий капиталга инвестицияларнинг энг юқори улуши Хитой (25,6 фоиз), Россия (13,4 фоиз), Саудия Арабистони (7,9 фоиз) ва Туркия (6,4 фоиз) мамлакатлари ҳиссасига тўғри келган.
Статистик рақамларга қараганда, бундан 5 йил илгари, яъни 2019 йилда асосий капиталга 189,9 триллион сўмлик инвестициялар ўзлаштирилган. Шундан Ўзбекистон кафолати остида жалб қилинган хорижий кредитлар 27,9 триллион сўмни ташкил этган.
2020 йилда 202 триллон сўм инвестициялар ўзлаштирилган бўлиб, шундан 22,5 триллион сўми (2019 йилдагидан 11,1 фоиз кам) республикда кафолати остидаги хорижий кредитлар ҳисобидан молиялаштирилган.
Агентлик маълумотларида 2021 йилда мамлакатда асосий капиталга 245 триллион сўмлик инвестициялар ўзлаштирилгани келтирилган. Шундан 17,3 триллион сўми Ўзбекистон ҳукумати кафолати остидаги хорижий кредитлар ҳиссасига тўғри келади.
2022 йилда асосий капиталга жами 269,9 триллион сўмлик инвестициялар ўзлаштирилган. Бунинг 15,2 триллион сўми ҳукумат кафолати остидаги хорижий кредитлар ҳисобидан молиялаштирилган.
Изоҳ (0)