“Ўзбекнефтгаз” халқаро рейтингдан жой олиш учун Fitch Ratings Ltd билан шартнома тузгани маълум бўлди.
Давлат харидлари электрон порталида “Ўзбекнефтгаз” АЖ ва Fitch Ratings Ltd ўртасида 195 минг долларлик шартнома тузилганини кўриш мумкин.
Порталда ҳужжат 2024 йил 11 март куни имзолангани, уни тузишдан мақсад эмитент ва эмитент томонидан чиқарилиши мумкин бўлган қимматли қоғозлар (облигация) учун очиқ рейтинглар тақдим этилиши экани ёзилган.
Fitch Ratings корпоратив ва суверен кредит рейтингларини белгилаш, кредитга лаёқатлиликни баҳолаш ва рискларни таҳлил қилиш билан шуғулланади.
Инвестициялашда облигациялар рейтинги компания ёки ҳукуматнинг кредитга лаёқатлилигини баҳолаш ҳисобланади. Кредит рейтинги облигациялар каби қарз қимматли қоғозларига потенциал инвесторлар учун молиявий кўрсаткич бўлади. “BBB” дан паст бўлган облигациялар рейтинглари инвестициялар учун хавфли деб топилади.
“Ўзбекнефтгаз” 2021 йилдан бери мазкур агентликдан халқаро кредит рейтингларини олиб келмоқда. Хусусан, 2022 йил 23 сентябрда Fitch Ratings “Ўзбекнефтгаз” кредит рейтинги бўйича ҳисобот эълон қилган. Унга кўра, компаниянинг кредит рейтинг баҳоси “BB” (барқарор) даражада тасдиқланган. 2023 йилда ҳам бу баҳо ўзгаришсиз қолдирилган.
Fitch “Ўзбекнефтгаз” кредит рейтингига барқарорлик баҳоси берилишига сабаб сифатида унинг тўлиқ давлатга тегишли эканини келтирган. Агентлик таҳлилида компания олаётган қарзлар (кредитлар) давлат томонидан кафолатланиши ва ҳукумат “Ўзбекнефтгаз”ни жуда кучли қўллаб-қувватлашига алоҳида урғу берилган.
“2022 йил охирида компания жамланган қарзининг тахминан 65 фоизи давлат томонидан кафолатланган. Қўллаб-қувватлашнинг бошқа шаклларига “Ўзбекнефтгаз” томонидан ундириладиган либераллаштирилган нефть маҳсулотлари нархлари, солиқ имтиёзлари ва камайтирилган дивидендлар киради”, — дея қайд этган рейтинг агентлиги.
Изоҳ (0)