Ўзбекистонда 2024 йил 1 февралдан бошлаб тадбиркорлик субъектларининг барқарорлик рейтинги жорий этилганди. Унга кўра, рейтинг кўрсаткичи юқори корхоналарга қатор имтиёзлар берилиши кўзда тутилган.
Савдо-саноат палатаси хабарига кўра, 2024 йил 1 апрелдан тадбиркорлик субъектларига субсидия, имтиёз ва преференсиялар уларнинг рейтинг даражасидан келиб чиққан ҳолда жорий этилади.
Рейтинг доирасида корхоналар тўрт тоифага ажратилади. Хусусан, ААА, АА ва А тоифалар — юқори барқарорлик рейтинги ҳисобланади.
BBB, BB ва B тоифалар — ўрта барқарорлик, CCC, CC ва C тоифалар — қониқарли барқарорлик, D тоифа — қуйи барқарорлик рейтингидан жой олади.
Мазкур рейтингда юқори балл тўплаган корхоналар рағбатлантирилади. Масалан, ААА тоифасини олган тадбиркорлик субъектларида солиқ текширувлари ўтказилмайди. Уларга қўшилган қиймат солиғидан ҳосил бўлган салбий фарқ суммаси бир кун муддатда қайтариб берилади.
Рейтинг баҳолаш мезонлари 23 та бўлиб, улар умумий, балларни камайтирувчи ва рағбатлантирувчи гуруҳларга бўлинади. Умумий гуруҳда 10 та мезон бўлиб, ҳар бирига 10 баллдан, жами 100 балл йиғиш мумкин. Масалан, корхона ходимининг ойлиги республикадаги энг кам иш ҳақидан кам бўлса, тадбиркорлик субъекти 5 баллидан айрилади. Ойлик миқдори 25 фоизга ошган бўлса, 2 балл, 25 фоиздан 50 фоизгача ўсган бўлса, 4 балл, 75 фоизгача 6 балл, 100 фоизгача бўлса, 8 балл, 100 фоиздан юқори бўлса, 10 балл қўшиб берилади.
Рейтингда паст балл эгаллаган корхоналарга жазо чоралари қўлланмайди. Юқори барқарорлик рейтингидаги тадбиркорлар ҳар йили 20 август — Тадбиркорлар куни арафасида тақдирлаш учун давлат мукофотлари ҳамда “Фаол тадбиркор” кўкрак нишонига тавсия этилади.
Корхонанинг мазкур рейтингдаги ўрнини Савдо-саноат палатаси веб-сайти орқали корхона СТИР рақамини киритган ҳолда билиш мумкин.
Изоҳ (0)