Ўзбекистонда 2025 йил 1 мартдан ёшга доир пенсиялар фуқаролар мурожаатисиз тайинлана бошлайди. Бу ҳақда Пенсия жамғармаси хабар берди.
Жамғарманинг маълум қилишича, келаси йил мартдан бошлаб пенсия ёшига етган фуқароларга пенсиялар автоматик тарзда, яъни ҳеч қандай ҳужжат талаб этмаган ҳолда ва фуқаронинг мурожаатисиз тайинланади. Бу жараёнда шахсга доир маълумотлар вазирлик ва идоралар электрон базаларидан олинади.
Бунинг натижасида фуқаролардан пенсия тайинлашда қўшимча ҳужжатлар йиғиш учун Пенсия жамғармасининг ҳудудий бўлинмасига мурожаат қилиш талаб этилмайди. Пенсия ёшига етган фуқаронинг телефон рақамига пенсия тайинлангани ва унинг миқдори тўғрисида маълумот юборилади, – дея янги тизим қандай ишлашини тушунтирди жамғарма.
Шунингдек, пенсияга чиқмай ишлашда давом этиш истагидаги ҳамда пенсия миқдоридан норози бўлган фуқароларга автоматик тайинланган пенсияни тўхтатиш ҳуқуқи берилади. Бунда пенсия автоматик тайинлангани ёки тайинланиши рад этилгани ҳақида SMS хабар юборилади. Фуқаро пенсия тайинлангани ёки тайинланиши рад этилганидан, унинг миқдоридан норози бўлган тақдирда жамғармага ариза билан мурожаат қилиши мумкин.
Эслатиб ўтамиз, 2024 йил 1 январдан фуқаролар учун Ягона интерактив давлат хизматлари портали орқали пенсия тайинлашни сўраб онлайн мурожаат қилиш имкони яратилди. Шу билан бирга, Пенсия жамғарилган пенсия маблағларини Халқ банкининг мобил иловаси орқали олиш йўлга қўйилди.
Аввалроқ мамлакатда пенсияни ҳисоблашда нималар инобатга олиниши тушунтирилганди.
Изоҳ (0)