“Чирчиқ саноат маҳсулотлари ишлаб чиқариш бўйича 5-ўринга тушиб кетди” — Зоир Мирзаев

Чирчиқ шаҳрида Тошкент вилояти ҳокими Зоир Мирзаев раислигида сессия бўлиб ўтмоқда. Бу ҳақда вилоят ҳокимлиги хабар берди.  

Халқ депутатлари Чирчиқ шаҳар кенгашининг навбатдан ташқари сессиясида сўз олган вилоят раҳбари шаҳар имкониятлари ва бу имкониятлардан қай даражада фойдаланилаётгани ҳақида гапирди. 

Чирчиқнинг драйвери саноат. Бироқ бир вақтлар вилоятда пешқадам бўлган Чирчиқ бугун саноат маҳсулотлари ишлаб чиқариш бўйича 5-ўринга тушиб кетди, — дея Зоир Мирзаевдан иқтибос келтиради ҳокимлик ахборот хизмати. 

Зоир Мирзаев сессияда шаҳарнинг энг муҳим иқтисодий кўрсаткичларига тўхталган.

Агар реал ҳолатга қаралса, иқтисод комплекси салгина ҳаётнинг ичига кирганда эди, маҳаллий бюджетга қўшимча 30 миллиард сўм тушириш имкониятини кўрган бўларди, — деди Зоир Мирзаев.

Бундан ташқари, ҳудудда ҳоким ёрдамчиларининг тавсияси билан берилган 6 миллиарддан зиёд кредит муаммоли кредитга айланган. Умуман, Чирчиқда бугунги кунда 60 миллиард сўмлик муаммоли кредит йиғилиб қолган. Шаҳарда янги иш бошлаган кичик бизнес субъектларининг 25 фоизи фаолиятини тўхтатган. Бу ҳолат шаҳарда бизнес муҳити кўнгилдагидек эмаслигини кўрсатади.

Хусусан, кейинги йилларда шаҳарда уй-жой, коммунал соҳада жуда катта ҳажмдаги ишлар бажарилгани, таъминот яхшилангани алоҳида таъкидланди, — дейилади ҳокимлик хабарида.

Қўшимча қилинишича, сессияда ташкилий масала ҳам кўрилиб, собиқ ҳоким Даврон Ҳидоятовнинг ўрнига янги раҳбар тайинланади. Даврон Ҳидоятов президентнинг 2021 йил 30 январдаги фармони билан лавозимидан озод этилган Тошкент вилояти ҳокими Рустам Холматовнинг ўрнига вилоят ҳокими вазифасини бажарувчи этиб тайинланган эди. Ўша йили ноябрь ойида эса вилоят ҳокимлигидан олиниб, Чирчиқ шаҳри ҳокими сифатида иш бошлаганди. Даврон Ҳидоятов ўрнига Тошкент вилояти ҳокими вазифасини бажарувчи этиб Қашқадарёнинг собиқ ҳокими Зоир Мирзаев тайинланганди.