Тошкент вилояти ҳокимлиги Чирчиқ шаҳри ҳокими Даврон Ҳидоятов лавозимидан кетганини тасдиқлади

Тошкент вилояти ҳокимлиги ахборот хизмати Чирчиқ шаҳри ҳокими Даврон Ҳидоятовнинг бошқа ишга ўтаётганини, ҳокимликдан кетганини тасдиқлади.

Чирчиқ шаҳри ҳокими лавозимида ишлаб келаётган Даврон Ҳидоятов бошқа ишга ўтаётгани муносабати билан вилоят ҳокими Зоир Мирзаев унинг келгуси фаолиятига омад тилади. Даврон Ҳидоятовга вилоят ҳокимлигининг фахрий ёрлиғи топширилди, — дейилади расмийлар изоҳида. 

Аввалроқ “Дарё” манбаси шаҳарнинг собиқ ҳокими айни кунда бошқа лавозимда иш бошлагани ҳақида маълумот берганди.

Ҳокимлик ахборот хизмати Даврон Ҳидоятов 12 март куни шаҳар аҳолиси учун сайёр қабул ўтказганини билдирганди. Демак ушбу қабул Ҳидоятовнинг ҳоким сифатидаги сўнгги қабули ҳисобланади. 

Даврон Ҳидоятов президентнинг 2021 йил 30 январдаги фармони билан лавозимидан озод этилган Тошкент вилояти ҳокими Рустам Холматовнинг ўрнига вилоят ҳокими вазифасини бажарувчи этиб тайинланган эди. Ўша йили ноябрь ойида эса вилоят ҳокимлигидан олиниб, Чирчиқ шаҳри ҳокими сифатида иш бошлаганди. Даврон Ҳидоятов ўрнига Тошкент вилояти ҳокими вазифасини бажарувчи этиб Қашқадарёнинг собиқ ҳокими Зоир Мирзаев тайинланганди.