Тошкент вилоятининг Чирчиқ шаҳри ҳокими Даврон Ҳидоятов лавозимидан кетди. Бу ҳақда “Дарё” манбаси хабар берди.
“Дарё” манбасининг билдиришича, шаҳарнинг собиқ ҳокими айни кунда бошқа лавозимда иш бошлаган.
Ҳокимлик ахборот хизмати Даврон Ҳидоятов кеча, 12 март куни шаҳар аҳолиси учун сайёр қабул ўтказганини билдирган. Катта эҳтимол билан ушбу қабул Ҳидоятовнинг ҳоким сифатидаги сўнгги қабули ҳисобланади.
Вилоят ҳокимлиги ахборот хизмати масъули Ҳидоятовнинг бошқа ишга ўтаётганини инкор этмади. Аммо ҳозирча ҳокимнинг ишдан кетгани расмий эълон қилинмаганини қўшимча қилди.
Даврон Ҳидоятов Президентнинг 2021 йил 30 январдаги фармони билан лавозимидан озод этилган Тошкент вилояти ҳокими Рустам Холматовнинг ўрнига вилоят ҳокими вазифасини бажарувчи этиб тайинланган эди. Ўша йили ноябрь ойида эса вилоят ҳокимлигидан олиниб, Чирчиқ шаҳри ҳокими сифатида иш бошлаганди. Даврон Ҳидоятов ўрнига Тошкент вилояти ҳокими вазифасини бажарувчи этиб Қашқадарёнинг собиқ ҳокими Зоир Мирзаев тайинланганди.
Изоҳ (0)