Исроил Ғазо жанубидаги Рафаҳ шаҳрида йиғилган 1,4 миллион нафар фаластинликни вақтинчалик гуманитар анклавларга кўчирмоқчи. Бу ҳақда 13 март куни Исроил мудофаа кучлари матбуот котиби Даниэль Хагари маълум қилган. CNN нашри воқеа ҳақида батафсил хабар берди.
Исроил расмийсига кўра, Рафаҳ операцияси — “амалга оширилиши шарт” бўлган вазифа. Бу операция давомийлиги уни амалга ошириш пайтида дуч келинадиган шарт-шароитга боғлиқ.
Маълумотларга қараганда, Ғазо сектори аҳолисининг ярмидан кўпи анклав шимоли ва марказидан қочиб, ҳозир Миср билан чегарадош Рафаҳда бошпана топмоқда. Анклав шимолида эса тахминан 300 минг ғазолик яшаб қолган.
“Биз 1,4 миллион нафар ғазолик халқаро ҳамжамият билан ҳамкорликда яратадиган гуманитар анклавларимизга кўчиб ўтишига ишонч ҳосил қилишимиз керак. Махсус анклав зонаси уларни вақтинчалик бошпана, озиқ-овқат, сув, дала касалхоналари билан таъминлайди”, — деган Даниэль Хагари.
Хабарда айтилишича, ҲАМАС аскарлари ва маҳаллий аҳоли битта ҳудудда қолаётган экан, Исроил операцияси ҳали-бери тугамайди. ҲАМАСни енгиш учун у оддий аҳолидан ажратиб олиниши керак.
Изоҳ (0)