Ғазода ўт очишни тўхтатиш бўйича музокаралар давом этмоқда, бироқ воситачилар можаро томонлари ўртасида келишувга интилиш кўрмаяпти. Бу ҳақда Қатар Ташқи ишлар вазирлиги матбуот котиби Мажид Ал-Ансорий маълум қилган. Бу ҳақда ТАСС нашри батафсил маълумот берган.
“Қатар, шунингдек, минтақавий ва халқаро воситачиларнинг давом этаётган саъй-ҳаракатлари Ғазо секторида ўт очишни тўхтатишга қаратилган. Доҳа ва Қоҳирада музокаралар давом этмоқда, бироқ биз ўт очишни тўхтатиш бўйича келишувга яқинлашганимиз йўқ. Бу кетишда ҳали-бери тинчлик бўлмайди”, — деган Қатар расмийси.
Қатарлик дипломатнинг қайд этишича, унинг ҳукумати урушда қисқа пауза эмас, балки Фаластин анклавида доимий ўт очишни тўхтатишни хоҳлайди. Ғазодаги вазият оғирлашмоқда ва Қатар можаронинг барча томонлари билан саъй-ҳаракатларини давом эттиришни истайди. Келишувга умид ҳали бор бўлса-да, бу кўп вақт олиши мумкин.
Маълумот ўрнида, 10 март куни Миср пойтахти Қоҳирада бўлиб ўтган музокараларда ҲАМАС ва Исроил вакиллари бир тўхтамга кела олмагани маълум қилинган эди. Исроилнинг талаблари ўта адолатсиз деб ҳисоблаган ҲАМАС келишувга имзо қўйишдан бош тортган.
Изоҳ (0)