14 март куни “Ироқ исломий қаршилик ҳаракати” гуруҳи Ўрта Ер денгизи соҳилидаги Исроил ҳарбий базасини нишонга олган. Оқибатда ҳарбий базага жиддий шикаст етган. Бу ҳақда IRNA нашри хабар берди.
Хабарда айтилишича, ушбу ҳужум қаршилик ҳаракатининг Сурияда фаолият юритувчи тарафдор гуруҳлари томонидан ташкил этилган. Қаршилик ҳаракатига тегишли ҳарбий дронлар Исроил ғарбидаги Палмачим авиабазасига ҳужумлар уюштирган.
Сўнгги икки ҳафтада Ироқдаги кучлар томонидан Исроилга қарши кўплаб операциялар ўтказилгани хабар қилинган. Ҳужум дронлари Исроилнинг Ливан билан чегарадаги ҳарбий базалари ва ҳарбий таъминот карвонларини нишонга олган.
Шу ҳафта бошида “Ироқ исломий қаршилик ҳаракати” Ал-Жалил ҳудудида жойлашган Исроилнинг “Раш Пина” аэропортига ҳужум ташкил этган эди. Ҳужумда бир киши ҳалок бўлгани айтилган эди. Гуруҳ, шунингдек, Ҳайфа шаҳридаги маҳаллий аэропорт ва электр станциясига ҳам ҳужум қилган. Оқибатда Ҳайфадаги исроилликларнинг бир гуруҳи электр таъминотидан маълум вақт узилиб қолган.
Изоҳ (0)