Ўзбекистонда ўрмон ёнғинлари келиб чиқишига сабаб бўлганлар учун жарима миқдори белгиланди

Президент томонидан 13 март куни имзоланган қонун билан Маъмурий жавобгарлик тўғрисидаги кодексга қўшимча ва ўзгартиришлар киритилди.

Унга кўра, ўрмонларда ёнғин хавфсизлиги талабларини бузиш, агар ёнғин чиқишига олиб келган бўлса, қуйидаги миқдорда жарима солишга сабаб бўлиши белгиланди:

• фуқароларга БҲМнинг 10 бараваридан 15 бараваригача (3,4 миллион сўмдан 5,1 миллион сўмгача);
• мансабдорларга БҲМнинг 20 бараваридан 25 бараваригача (6,8 миллион сўмдан 8,5 миллион сўмгача).

Шунингдек, шахснинг эҳтиётсизлиги ёки ёнғин хавфсизлиги қоидаларини бузганлиги туфайли уй-жой фондида одамларнинг соғлиғига зарар етиши ёхуд ўзганинг мол-мулки шикастланиши ёки унинг йўқ қилиниши билан боғлиқ бўлмаган тарзда ёнғин содир бўлганда мазкур шахс ёнғин хавфсизлиги қоидаларини бузганлик учун маъмурий жавобгарликдан озод қилинади.

Ушбу қонун Сенат томонидан 9 февраль куни маъқулланганди. Қонун муҳокамасида сенатор Толибжон Мадумаров бугунги кунда ёнғин хавфсизлиги қоидаларини бузган ҳуқуқбузарларга нисбатан қўлланаётган енгил жазо чоралари кутилаётган натижани бермаётганини айтиб ўтганди.

Маълумотларга кўра, 2023 йилда 10 минг 204 та ёнғин ҳодисаси юз бериб, унда 251 нафар фуқаро жабрланган, шундан 79 нафари вафот этган, жисмоний ва юридик шахсларга эса 270,4 миллиард сўмлик зарар етказилган. 2018—2022 йилларда республика ўрмон хўжаликларида жами 40 та ёнғин ҳисобга олиниб, натижада 431 гектар ўрмонзорларга жиддий зиён ва 20,296 миллиард сўмдан зиёд зарар етган.

Қонун расмий эълон қилинган кундан эътиборан 3 ой ўтгач кучга киради.