Куни кеча АҚШда “Оскар” мукофоти ўз совриндорларига топширилди ва барча ғолиблар рўйхати эълон қилинган эди. Эндиликда кино ихлосмандлари кўнглидан чуқур жой эгаллаган, аммо кино танқидчилар мезонига кўра Америка кино-мукофотини қўлга киритмаган актёрлар ҳақида маълумот берамиз.
Қизиқарлиси, кичик Роберт Дауни ва Киллиан Mёрфи каби актёрлар бир неча йиллар давомида орзу қилинган мукофот учун курашиб келди ва ниҳоят жорий йилдаги маросимда уларга омад кулиб боқди. Қуйида берилган рўйхатдаги актёрларда эса бунинг акси кузатилмоқда.
Режиссёр Брэдли Купернинг “Maэстро” фильми “Оскар-2024”да бир неча номинацияларда иштирок этди аммо на фильм актёрлари, на режиссёрга кино танқидчилар томонидан илиқ муносабат билдирилди.
Машҳур актёр Леонардо ДиКаприо иштирокидаги “Гулли ой қотиллари” ғолибликка асосий номзодлардан бири бўлиб келган бўлса-да, овоз бериш жараёнида актёр омадсизликка учради ва бирорта номинацияда ютмади. Эслатиб ўтамиз, 2016 йилда режиссёр Александр Гонсалес Иняриттунинг “Омон қолган” драмасидаги бош роли учун Леонардо ДиКаприо ўзининг узоқ кутилган “Оскар”ини қўлга киритган.
Сўнгги йилларда британиялик актёр Бенедикт Камбербэтч турли номинациялар бўйича “Оскар”га сазовор бўлган фильмлар — “12 йил қулликда” ва “Тақлид ўйини” да рол ўйнади, аммо мукофотни қўлга киритолмади. Ҳозирча актёрнинг карьерасида фақат BAFTA, “Эмми” ва TV Choise мукофотлари мавжуд.
Италиялик актриса ва модел Моника Беллуччи ҳамда америкалик актёр Жонни Деппга ҳам ҳануз ҳеч қандай кино-мукофот берилмаган. Шунингдек, “Оскар” олмаган актёрлар рўйхатида Том Круз, Шэрон Стоун, Кэмерон Диас ва Кира Найтли ҳам бор. Умид қиламизки, кейинги йилларда мазкур санъаткорлар муносиб баҳоланади ва расман эътироф этилади.
Изоҳ (0)