Buyuk Britaniya qiroli Charlz III ning rafiqasi qirolicha Kamilla yangi Barbining yuziga aylandi. O‘yinchoqlar ishlab chiqaradigan kompaniya — Mattel’ning vakili Bukingem saroyidagi ziyofatda qirolicha sharafiga yaratilgan qo‘g‘irchoqni sovg‘a qildi. Bu haqda “Pravila Jizni” nashri xabar qilmoqda.
Mattel kompaniyasi qirolicha Kamilla namunasidagi qo‘g‘irchoq uchun xuddi hayotdagidek obrazni yaratdi: yangi Barbi ustida ko‘k ko‘ylak va qora palto bo‘lib, unga zargarlik buyumlarining kichraytirilgan nusxasi bilan bezak berilgan.
Nashrning yozishicha, Kamillaga qo‘g‘irchoq sovg‘a qilishganda u kulgidan o‘zini tiya olmadi va “dizaynerlar meni taxminan 50 yoshga yoshartirib yuboribdi, — deb hazillashdi. — Sizga katta rahmat, bunday ajoyib sovg‘a uchun sizdan minnatdorman”, — dedi u. Mehmonlarga qarata qirolicha qo‘shimcha qildi:
“Barchaning uyida Barbi bo‘lishi shart!”
Barbining Instagram’dagi rasmiy akkaunti ham yangi qo‘g‘irchoq haqida e’lon berdi. Postda “Barbi qirolicha hazratlari WOW (World of women — Ayollar dunyosi) harakatidagi yetakchiligini e’tirof etib, uni o‘ziga xos qo‘g‘irchoq bilan sharaflaydi”, deb yozib qoldirilgan.
Biroq postdagi izohlarda foydalanuvchilar Mattel’ni qattiq tanqid qilgan. Masalan, “Kamilla qirollik oilasiga genetik jihatdan bog‘liq emas”, “Yangi Barbi Mattel’ning qadriyatlariga zid”, “Kamilla qizlar uchun o‘rnak bo‘ladigan qirolicha emas” kabi izohlar qoldirildi.
Foydalanuvchilar, shuningdek, marhuma malika Diana sharafiga hali ham Barbi yaratilmaganini eslashdi. Shuningdek, Keyt Middlton yaqinda jarrohlik amaliyotini o‘tkazgan vaqtda bunday qilish axloqsizlik deb baholashdi.
Charlz III 1996-yilda malika Diana bilan ajrashib, Kamillaga uylanganidan beri unga nisbatan ko‘plab salbiy fikrlar yog‘ilishi to‘xtamagan.
Izoh (0)